هلمند کې د پنبې حاصلاتو د شمېرو راټولولو په موخه سیمینار دائر شو
۹ تله ۱۴۰۳ه.ش
۲۷ رَبِیعُ الْأَوَّل ۱۴۴۶ه.ق
دهلمند ولایت د کرنې، اوبولګولو او مالدارۍ ریاست لخوا، په دې ولایت کې د پنبې د حاصلات ارزولو او د شمېرو ترلاسه کولو په موخه د مرکز لښکرګاه او ولسوالیو د کرنې کارکؤنکو ته یو ورځنۍ سیمینار دائر شو.
ددغه روزنیز سیمینار د پیل پر مهال د کرنې، اوبولګولو او مالدارۍ وزارت د پلان او برنامو د همغږۍ ریاست اړوند د احصایې او معلوماتو مدیر انجنیر نجیب الله وفا وویل :«غواړو په هلمند کې د پنبې د حاصلاتو ارزونه وکړو، ددغې ارزونې او سروې پر مهال به د هر في متر مربع ځمکې حاصلات راټولېږي، وزن کېږي او له مخې به یې د هر جریب په کچه د حاصلاتو مقدار معلومېږي.»
هغه وویل، هڅه کوي ترڅو هلمند کې د پنبې د کرنې او روزنې لپاره بزګرو ته اسانتیاوې برابرې کړي، چې له مخې به یې په بېلابېلو برخو کې ځمکوالو سره مرستې ترسره شي.
په یاد روزنیز سیمینار کې د پنبې د کرنیزو شمېرو او حاصلاتو معلومولو په موخه لازم معلومات له ګډونوالو سره شریک شو، چې دغه کارکوونکي به په عملي ډول په مرکز لښکرګاه او ولسوالیو کې د پنبې د احصائیوي ارقامو په راټولولو کې ترې ګټه واخلي.
