د ځنځيري ارزښت پراښتيا له لارې د ښځو پياوړتيا ملي برنامې دطرحې پر غني کولو خبرې وشوې
۱۷چنګاښ ۱۴۰۰
دکرنې، اوبولګولو او مالدارۍ وزارت د اوبولګولو او طبيعي سرچينو مرستيال او د ښځو چارو وزارت، د ښځو د سوداګرۍخونې، د افغاتستان د ښځو شبکه او د کروندګرو مېرمنو ټولنې استازو سره د يوې غونډې په ترڅ کې د ځنځيري ارزښت پراښتيا له لارې د ښځو پياوړتيا ملي برنامې دطرحې پر غني کولو خبرې اترې وشوې.
دکرنې وزارت د اوبولګولو او طبيعي سرچينو مرستيال حشمتالله غفوري وويل، چې دا برنامه د ښځو اړتياوو ته په کتو د ولسمشر شفاهي هدايت پر اساس ډيزاين شوې ده او په دې برنامه کې د ښځو د ټولو ستونزو حل لارې ځاي شوي دي. هغه وويل، چې ددې طرحې د لا بډاينې په پار ياده طرحه د ښځو چارو وزارت، د ښځو د سوداګرۍ خونې او د افغانستان کروندګرو مېرمنو ټولنې سره شريک کېږي.
يادې برنامې ته ۲۱۰ميليونه او ۱۶۵زره ډالر بوديجه په پام کې نيول شوې ده. دا برنامه د لسو کالو لپاره ډيزاين شوې ده،چې له ۱۴۰۰ ام کال څخه پيل او ۱۴۰۹کال کې پای ته رسېږي. دا برنامه د کرنې وزارت له خوا د ښځو چارو وزارت سره په همکارۍ په ۳۴ ولايتونو کې پلي کېږي. ددې برنامې په پلي کېدو سره ۲۳۲ ښځې ترې په مستقيمه توګه برخمنې کېږي.
د ځنځيري ارزښت پراښتيا له لارې د ښځو پياوړتيا ملي برنامې اصلي موخه اقتصادي وده، د خوړو خونديتوب،د کورنيو غوره معيشت،دتوليدي ګروپو جوړول او مديريت، د باکيفيته توليد په پار د ښځو کرنيزې ټولنې جوړول او مديريت، دښځو کرنيزو توکو ته بازار موندنه او پروسس، د روزنيزو برنامو، ورکشاپونو او سيمينارونو په لاره اچولو سره د ښځو وړتياوې لوړول،د ملې طرحو ارزونه او پلي کول او دهغو پروژو او برنامو ترمنځ د هغږۍ ايجادول دي، چې په هېواد کې د ښځو د وضعيت ښه کولو په برخه کې فعاليت کوي.
