د ننګرهار وادې کرنیز شرکت: د ننګرهار کانال پروژه د ۳۱ زره هکتارو ځمکو د خړوبولو وړتیا لري
۱۴ لړم ۱۴۰۴ هـ.ش
۱۴ جُمَادَى الأول ۱۴۴۷ هـ.ق
د ننګرهار وادي کرنیز شرکت، د «ننګرهار کانال پروژه» د هېواد له مهمو او بنسټیزو اقتصادي، کرنیز او ټولنیزو پروژو څخه شمېرل کېږي، چې د ختیځو ولایتونو د کرنیز سکتور د پیاوړتیا بنسټیزه ملا تړلې ده.
د یاد شرکت د اوبو د لوی نهر تازه او خوښوونکی وضعیت د ښې راتلونکې زېری ورکوي. د دغه ستر نهر اوبو عمومي ظرفیت ۵۰ متر مکعبه په ثانیه دی، چې د ۳۱ زره هکتارو کرنیزو ځمکو د خړوبولو وړتیا لري. دغه ځمکې د هېواد د کرنیزې ودې، د بزګرانو د اقتصادي ثبات او د کرنیزو حاصلاتو د زیاتوالي لپاره ځانګړی ارزښت لري.
اوس مهال د نهر اوبه په پرلهپسې او پرېمانه توګه بهېږي. د کرنیزو او تخنیکي چارو ریاست اړوند د اوبو د ساتنې او څارنې سرپرست مولوي روحالله روحاني وايي، اوس شاوخوا ۵۰ متره مکعبه اوبه په ثانیه د څلورو فارمونو، کروندو، کرنیزو شرکتونو او اجاره لرونکو ځمکو ته په منظم ډول توزیع کېږي.
مولوي روحاني زیاتوي، د ننګرهار وادي کرنیز شرکت مشرتابه هڅه کوي، د اوبو مدیریت، د نهر پاک ساتنه او تخنیکي څارنه لا معیاري کړي، ترڅو کروندګر د پوره اوبو له شتون څخه برخمن شي او د هېواد کرنیز تولید لا ډېر شي.
د کرنیزو چارو کارپوهان باور لري، چې دغه پرمختګ نه یوازې د خاورې د حاصلخېزۍ په لوړولو کې مهم رول لري، بلکې د خلکو په اقتصاد، د کرنیزو محصولاتو په زیاتوالي او د سیمې په زرغونتیا کې به هم اغېزناک بدلونونه رامنځته کړي.
