د تېرې ورځې د شهیدانو د فاتحې په مراسمو کې د کرنې وزارت سرپرست: پرونۍ پېښه، ملي غمیزه وه

۱۳ لړم ۱۳۹۹
د کرنې وزارت کارکوونکو د کابل پوهنتون د تېرې ورځې خونړي برید د شهېدانو لپاره د فاتحې مراسم په ځای کړل.
د کرنې وزارت مشرتابه او کارکوونکي، دیاد وزارت د پلان په تالار کې د کابل پوهنتون د شهید شویو استادانو او زده کړیالانو روح ته د دعا لاسونه لپه کړل، د شهیدانو روح ته یې دعا وکړه او هغوی ته یې د لوی خدای (ج) په دربار کې د فردوس جنت هیله وکړه.
د قران کریم له تلاوت او د ګډونوالو له دعا وروسته د کرنې وزارت سرپرست او نوماند وزیر ډاکټر انوارالحق احدي په خپلو خبرو کې وویل: «پرونۍ پېښه، بده پېښه وه، دا ترورستي کار، لوی جنایت دی، دا پېښه په هيڅ ټکو محکوم او تقبیح کولای نه شو، باید ددې پېښې پر وړاندې په یووالي مقاومت وکړو.»
د ښاغلي احدي په خبره، د ورته پېښو پر وړاندې باید حکومت او خلک ودریږي، ځکه له مقاومت پرته بله لار نشته.
د کرنې وزارت سرپرست وویل: «سره له دې چې داسې پيښې دردوونکي دي، خو باید مقاومت وکړو، څو ورځې وړاندې د کوثر د روزنیز مرکز پېښه او پرونۍ پېښه، ترورستي پېښې دي، باید د داسې پېښو پر وړاندې مقاومت وکړو، تسلیمېدل د حل لار نه ده، هغو کورنیو ته چې په دې پېښه کې یې خپل د کورنۍ ګران غړي له لاسه ورکړي دي، تسلیت وایم، او ورته د صبر او استقامت هیله کوم، دغه راز ددې تروریستي پېښې ټپیانو ته عاجله شفا غواړم.»
ښاغلی احدي وویل، هیله لرم، چې خلک د خپلو حقونو په حفظ سره ژوند ولري او د انسانیت په اډانه کې ژوند وکړي، نه د وحشت په اډانه کې.»