ارزګان کې د ۴۷کرنيزو پروژو چارې بشپړې شوې

۱۶ ليندۍ ۱۳۹۹
د ارزګان ولایت د کرنې، اوبولګولو او مالدارۍ ریاست چارواکي وایې، سږکال په ارزګان ولایت کې د کرنیزو محصولاتو مدیریت دطرحې په اډانه کې ۷۲ بېلابېلي پروژې پلي کیږي چې، له دې ډلې د ۴۷پروژو چارې بشپړې او ګټې اخيستنې ته چمتو شوي دي. د دوی په خبره د پاتې ۲۵ پروژو رغنيزې چارې هم ۹۵ سلنه بشپړشوې دي، چې ډېرژر به ګټې اخستنې ته وسپارل شي.
د ارزګان ولایت د کرنې، اوبولګولو او مالدارۍ رييس احمدشاه خیري وول چې، په یادو پروژو کې د کچالو پنځه او دپيازو ۵۰ زېرمتونونه، ۱۵د مېوو او سبو لمريز وچوونکي دستګاوې او دوه د مېوو صفر درجې سړې خونې شامل دي.
ددغو پروژو ټوليز لګښت ۳۰ميليونه ۷۹۳زره او ۲۵۲افغانۍ ده،چې ۹۰ سلنه يې دکرنې وزارت او لس سلنه نور يې برخمن شوي بزګران ورکوي.
يادې پروژې د کرنیزو محصولاتومدیریت، د بڼوالو او بزګرانو دمحصولاتو خوندي کولو او د دوی د عوایدو زیاتولو په پار پلي شوي دي.