د لغمان د کرنې ریاست او مستوفیت ترمنځ د عوایدو د زیاتوالي په موخه ناسته وشوه
۱۲ کب ۱۴۰۴ه.ش
۱۴ رَمَضانُ المُبارَک ۱۴۴۷ه.ق
د لغمان د کرنې، اوبولګولو او مالدارۍ ریاست رییس مولوي سلیمان ایمن دخپل کار په دفتر کې د مستوفیت د غیرمالیاتي عوایدو له مسؤلینو سره د چارو د همغږۍ په موخه ناسته وکړه.
په دې ناسته کې د غیرمالیاتي عوایدو آمر مفتي سیف الرحمن حزب الله او د غیرمالیاتي عوایدو مدیر زیړګل رحمانزي ګډون درلود. همدارنګه د کرنې ریاست تخنیکي سلاکار سردار زیار هم په ناسته کې حاضر و.
یاده ناسته د ځمکو د اجارو د باقیاتو پیسو د تصفیې، د عوایدو د زیاتوالي، او د ګډې همکارۍ د پیاوړتیا په موخه ترسره شوه.
د مستوفیت د غیرمالیاتي عوایدو آمر وویل، چې د عوایدو د لوړولو او د کسر د مخنیوي لپاره غواړي له عایداتي ادارو سره پرلهپسې ناستې وکړي، څو هغوی وهڅول شي چې خپل عایدات زیات کړي. نوموړي غوښتنه وکړه، چې د کرنې ریاست د هغو اجارهدارانو قراردادونه دې وڅېړل شي چې باقیات لري، او باقیدار مستأجرین دې را وغوښتل شي چې خپلې اجارې پر وخت تحویل کړي.
په همدې حال کې د کرنې رییس مولوي سلیمان ایمن د راغلو مېلمنو هرکلی وکړ او د عوایدو د راټولولو په برخه کې یې د هغوی له هڅو مننه وکړه. نوموړي ډاډ ورکړ، چې د ځمکوالۍ آمریت د کارکوونکو له لارې به د مستأجرینو قراردادونه وڅېړل شي او هغه کسان چې د اجارو له درکه پوروړي دي، راجلب به شي څو خپلې پاتې پیسې تحویل کړي.
د ناستې په پای کې د کرنې ریاست، مستوفیت او ولایت مقام د استازو په ګډون د یوې ګډې کمېټې پر جوړېدو ټینګار وشو، تر څو د عوایدو د راټولولو او تنظیم چارې لا منظمې شي.
