خوست کې د جلغوزې او غوزانو د ځنګلونو د بیارغونې په پار کورني قوریې جوړیږي
۶ لېندۍ ۱۳۹۸
د خوست د کرنې، اوبولګولو او مالدارۍ ریاست ددې ولایت د طبیعي ځنګلونو د خوندي کولو او بیا رغونې په پار هلې ځلې کړندي کړي دي، په همدې موخه ددې ولایت د جلغوزې او چهارمغزو د ځنګلونو د بیارغونې په پار د یاد ولایت په پنځو ولسوالیو « موسی خېل، ځاځيمیدان، تڼي، سپېره او دوه منده» کې ۳۶۰ بزګرانو ته د جلغوزې او چهارمغزو د کورنیو قوریو د جوړولو د پروژې چارې رسماً پیل او پر دغو بزګرانو د جلغوزې او چهارمغزو د کورنیو قوریو د جوړولو د اړونده توکو د وېش لړۍ پیل شو.
د خوست د کرنې رییس حفيظ الله شاه نوري وویل، چې ددې ولایت د جلغوزې او چهارمغزو د ځنګلونو د بیاروغونې په پار د یاد ولایت په پنځو ولسوالیو کې، چې په کې د موسی خېل، ځاځيمیدان، تڼي، سپېره او دوه منده ولسوالۍ شامل دي ۳۶۰ بزګرانو ته د جلغوزې او چهارمغزو کورني قوریي جوړيږي. د ښاغلي نوري په خبره د یادو کورنیو قوریو د جوړولو په پار ددې ولایت له دوه منده ولسوالۍ څخه پر بزګرانو د قوریو د جوړولو د اړینو توکو د وېش لړۍ رسماً ددې ولایت د والي حلیم فدایي او یوشمېر نورو چارواکو په شتون کې پیل شو. د خوست والي حلیم فدایي وویل، چې په یادو ولسوالیو کې د جلغوزې او چهارمغزو د دوه میلیونه او ۱۶۰ زره نیالګیو د تولید په پار به ۳۶۰ بزګرانو ته داسې قوریې جوړې شي، چې هر یوه قوریه به ی د شپږ زره نیالګیو د تولید وړتیا ولري او دوه زره او ۷۰۰ هکټاره ځمکه به پر ځنګل وپوښل شي.
د خوست د کرنې رییس حفيظ الله شاه نوري وایي، چې ددې پروژې له لارې په یادو ولسوالیو کې د ځنګوالۍ ۳۶ ټولنې هم جوړې شوي دي.
ددې پروژې ټولیز لګښت ۱۴.۵ میلیونه افغانۍ ده، چې په ترڅ کې به یې هر قوریه دار ته د جلغوزې دوه کیلو تخم او د چهارمغزو ۳۰ کیلو تخمونه، بېلچې، د خېشاوې توکي، اب پاش، دواپاش، څلور اوسپنیز تونلونه، ۲۵ کیلو ګرامه سپېنې او تورې سرې ورکول کیږي.
د خوست د کرنې رییس وویل، چې ددې پروژې په لومړي پړاو کې به خلکوته عامه پوهاوی، دویم پړاو کې به روزنیز پروګرامونه او درېیم پړاو کې به د بزګرانو ۲۰ سیمه ییز ښوونځي جوړيږي. ټاکل شوې، چې ددې پروژې له لارې تر درې کلونو پروې قوریه لرونکو سره تخنیکي مرستې وشي ترڅو د دوی نیالګي تر ځنګل پورې ورسیږي.
پر بزګرانو د جلغوزې او چهارمغزو د کورنیو قوریو د جوړولو د توکو په وېش غونډه کې د خوست د سوداګرۍ او پانګونې خونې رییس نواب امیرزی وویل، چې صنعتي او کرنیز تولیدات خلکو ته کار پیداکوي او ولسونه د هوساینې خواته بیایي. هغه زیاته کړه، چې د ولسمشر په ځانګړې پاملرنه د افغانستان ځمکني او هوایي دهلیزونه خلاصې شوي دي او د افغانستان کرنیز توکي د نړۍ هرې خواته په اسانۍ رسیږي.
په ورته وخت کې قومي مشر حاجي عبدالرحمن ځدراڼ وویل: «خوښ یم چې دولت کلیو او بانډو ته پاملرنه کوي او د ولس د ښیګڼې لپاره دوی ته اسانتیاوې رامنځ ته کوي.» هغه وویل چې د جلغوزې او چهارمغزو پروژه به د ولسونو په هوساینه، اقتصادي وده او ځنګلونو په رغونه کې مهم رول ولري او ولسونه به له دې پروژو څخه کلکه ساتنه کوي.
خوست د افغانستان د جلغوزیو او چارمغزو د ځنګلونو له برخمنو ولايتونو څخه دي، چې د دغو ځنګلونو یوه برخه له منځه تللې، خو اوس د کرنې وزارت د جلغوزیو ځنګلونو د بيا رغونې کولو په هڅه کې دي.
