ننګرهار کې پر بزګرانو د روب جوړولو توکي ووېشل شوه
۱۱ زمری ۱۴۰۲ه.ش
۱۵ مُحَرَّمُ الحَرام ۱۴۴۵ه.ق
د ننګرهار د کرنې، اوبولګولو او مالدارۍ ریاست په هڅو د ډاکار دفتر له لورې ۱۸۰ تنو بزګرانو ته د روب جوړولو توکي ورکړل شوي دي.
د ننګرهار د کرنې، اوبولګولو او مالدارۍ رییس مولوي عبدالستار محمد وویل، چې د ډاکار دفتر په همکارۍ ددې ولایت په شېرزادو، خوګیانو، سره رود او روداتو ولسوالیو کې ۱۸۰ تنو بزګرانو ته د روب جوړولو وسایل ورکړل شوي دي.
په یادو توکو کې هر بزګر ته ۹ قلمه توکې چې، یو کیلو یي او نیم کیلو یي پلاستیکي بوتلې، سلات ماشین، پلاستیکي سطل، تشت، قابګیر او د روب جوړولو دوه ډوله کیمیاوي مواد شامل دي.
وړاندې تردې هم ذکر شویو بزګرانو ته د سبو اصلاح شوي تخمونه د ډېر حاصل ترلاسه کولو په پار ورکړل شوې وه.
دغه راز بزګرانو ته د روب جوړولو، محصولاتو د ضایعاتو مخنیوی، بازارموندنې او نورو اړونده موضوع ګانو عملي او نظري روزنه هم ورکړل شوي دي.
