د کندهار دکرنې رییس په افغانستان کې د ملګرو ملتونو د خوړو او کرنې ادارې چارواکو سره وکتل
۲۹ چنګاښ ۱۴۰۲ه.ش
۳ مُحَرَّمُ الحَرام ۱۴۴۵ه.ق
د کندهار دکرنې، اوبولګولو او مالدارۍ رییس مولوی محمود مظلوم په افغانستان کې د ملګرو ملتونو دخوړو او کرنې ادارې مشر ریچارډ ټرینچارډ سره په داسې حال کې وکتل، چې د ملګرو ملتونو د خوړو او کرنې ادارې سلاکار نجیب الله امیرزی، په افغانستان کې د ملګروملتونو د خوړو او کرنې ادارې د بېړنیو مرستو مسوول عزت الله نوري، د ملګرو ملتونو د خوړو او کرنې ادارې د جنوب لویدیځ دفتر مسوول احمد فیروز آرین او د افغانستان په جنوب لویدیځ کې د یادې ادارې د بېړنیو مرستو مسوول ممتاز بریال هم شتون درلود.
ددې لیدنې په ترڅ کې د کندهار دکرنې، اوبولګولو او مالدارۍ رییس مولوی محمود مظلوم په افغانستان کې د ملګرو ملتونو د خوړو او کرنې ادارې مرستو او همکاریو څخه د مننه وکړه، چې د نورو سکټورونو ترڅنګ یې تل د کندهار دکرنې ریاست سره مرستې او همکارۍ کړي دي.
ښاغلی مظلوم دغه دراز په دې لیدنه کې د کندهار ولایت د بزګرانو او مالدارانو ستونزې او ددې سکټور ننګونې له یادو چاراکو سره شریک او په یادو برخو کې د لا ډېرو مرستو غوښتونه وکړه.
په همدې حال کې په افغانستان کې د ملګرو ملتونو دخوړو او کرنې ادارې مشر ریچارډ ټرینچارډ په خپلوخبرو کې وویل: «زه تل هڅه کوم، ترڅو په نړیوالو غونډو کې د افغانستان لپاره د مرستو لړۍ همداسې روانه وساتم، او څو څو ځلې مې په نړیوالو ناستو کې پر نورو مرستندویو ادارو او مؤسسو غږ کړئ، چې له افغانانو سره خپلو مرستو ته دوام ورکړي.»
د غونډې په پای کې د کندهار دکرنې رییس د ملګرو ملتونو د خوړو او کرنې ادارې چارواکو ته د هرراز همکاریو ډاډ ورکړ.
