ننګرهار کې د غواګانو د پوستکې ناروغۍ د مخنیوي په موخه د واکسیناسیون کمپاین پیل شوی

د ننګرهار د کرنې، اوبولګولو او مالدارۍ ریاست په هڅو د ملګرو ملتونو د خوړو او کرنې ادارې (FAO) له لورې د ننګرهار ولایت د مرکز په ګډون ددې ولایت په ۲۲ ولسوالیو کې د غواګانو د پوستکې ناروغۍ (لمپي سکین) د مخنیوي په موخه د واکسیناسیون کمپاین د بهسود ولسوالۍ د خاص بهسود سیمې څخه رسماً څارویو ته د واکسین کولو کمپاین پیل شو.
د کمپاین د پیل پرمهال د ننګرهار دکرنې، اوبولګولو او مالدارۍ رییس مولوی عبدالستار محمد فارم لرونکو او مالدارانو ته د یادې ناروغۍ په اړه وویل، چې د غواګانو د پوستکې ناروغي یوه ساري ویروسي ناروغي ده، چې په غواګانو کې د جلد خرابیدو او په پوستکې کې د غوټو او زخمونو پیدا کیدلو په شکل راڅرګندېږي، چې په نتیجه کې غواګانې خپل وزن د لاسه ورکوي، د شېدو په تولید کې يي کموالي راځي او د تلفاتو لامل يي کرځي، چې دغه ناروغي د چیچونکو حشراتو په وسیله د یو څاروی څخه بل څاروی ته لېږدول کېږي. 
ختیځ زون کې د (FAO) مسؤل خوشحال آصفي،  د ننګرهار د کرنې ریاست د څارویو روغتیا امر داکتر محمد ضمیر بهسودی او د (FAO) دفتر د مالدارۍ برخې مسؤل عبدالمعروف کوچې، چې د کمپاین پرمهال يي د کرنې اداری رییس ملتیا کوله، هر یو په خپل وار سره خبرې وکړې، اصفي زیاته کړه چې تېر کال په اوه ولسوالیو کې ۲۰ زره غواګانو ته یاد واکسین تطبیق شوي وه او ۷ زره مالدارانو ته يې په اړه عامه پوهاوی ورکول شوې وه. خو سږکال د ننګرهار ولایت د مرکز په ګډون۲۲ ولسوالیو کې د ۴۶ سیمه ییزو وترنرانو په واسطه ۲ سوه زره غواګانو ته د یادې ناروغۍ د مخنیوي په موخه واکسین تطبیق کېږي، او همداراز ۶۰ زره مالدارانو ته به په اړه يې عامه پوهاوي هم ورکول شي.