د ننګرهار مهمند دره کې د نږدې ۷ میلیونه افغانیو په لګښت یوه پروژې ګټې اخیستنې ته وسپارل شوه

۲۸ کب ۱۴۰۱ه‍.ش
۲۶ شَعبان المُعَظّم ۱۴۴۴ ه‍.ق
د ننګرهار د کرنې، اوبولګولو او مالدارۍ ریاست په هڅو د ملګرو ملتونو د پرمختیایي پروګرام (UNDP) د آبادۍ پروژې په مالي او د «DRC» مؤسسې په تخنیکي همکارۍ  د دې ولایت د مهمنددرې په ولسوالی کې د کروندي د اوبخور په موخه د اوبولګولو د یوې پروژې د رغولو چارې بشپړ او ګټې اخیستنې ته وسپارل شوه.
د چارواکو په خبره ددې پروژې ټولیز لګښت ۶.۷میلیونه افغانۍ ده، چې په ترڅ کې یې د مهمنددرې ولسوالی د امنټل کلي کې د ۹۱ متره په اوږدوالي د اوبو سربند، دوه زره متره ویالې، ۳۰ متره استنادی دېوال، یو پلچک او د اوبو د کنټرول ۱۰ ورخونه  په اساسي ډول رغول شوي دي. 
 ددې پروژې په بشپړیدو سره ۱۱۰۰ جریبه کرنیزې ځمکې ته د ابوخور زمینه برابره شوې ده.
د چارواکو په خبره د یادې پروژې د پلي کولو په لړ کې ۱۹۷ ځآیي اوسیدونکو ته د کار زمینه هم برابره شوې وه او له دې پروژې څخه زرګونه کورنۍ برخمنې شوي دي.
د ننګرهار دکرنې ریاست چارواکو قومي مشرانو ته سپارښتنه هم وکړه، او زیاته یي کړه چې د رغول شوو پروژو څخه باید په سمه توګه ساتنه او مراقبت وکړي.
یادو چارواکو خلکو ته ډاډ هم ورکړ چې د ننګرهار د کرنې، اوبولګولو او مالدارۍ وزارت مشرتابه هڅه کوي تر څو د همکارو برنامو او موسساتو پر مټ بزګرانو او مالدارانو سره ښي مرستې ترسره کړي، او د بشري مرستو تر څنګ پرمختیايي پروژی هم پلي کړي.