د هلمند کجکي کې د څلورو فرعي کانالونو پاکولو چارې پیل شوې

دهلمند ولایت د کرنې، اوبولګولو او مالدارۍ ریاست په هلو ځلو، د (CAHPO) مؤسسې په همکارۍ  ددې ولایت د کجکي ولسوالی نږدې ١١٠٠ تنو ځایي کاریګرو په مټ د څلورو لویو ویالو د پاکولو چارې پیل شوي دي.
د چارواکو په خبره ددې پروژې په ترڅ کې د کجکیي په ولسوالی کې څلور فرعي کانالونه( کجکي علیاء، کجکي سفلا،  قاضي خېل او سهرا) کانالونه، چې د کلونو راهسې نه دي پاک شوي او د سیمې بزګر یې له ګڼو ستونزو سره مخ کړي وه په اساسي ډول پاک کېږي.
په همدې موخه په نوموړې ولسوالی کې د ٢٩٦٤  تنه کاریګرو سروې ترسره شوې ده چې دا مهال یې له ډلې نږدې ١١٠٠ تنه کاریګر عملا کار کوي او پاتې نور کسان به هم په کار وګمارل شي.
د ذکر شوو کاریګرو د سروې او انتخاب چاري مخکې د کجکي ولسوالی د کرنیزو خدمتونو مسؤل حاجي حمزه او ګډ پلاوي په حضور کې ترسره شوې ده، چې د کار ښه ترسره کيدو په موخه به یې په دوامداره ډول نظارت هم ترسره کېږي.
ددې فرعي کانالونو په صفا کېدو سره به د بزګرو شنو فصلونو، بڼونو او همدارنګه د کورنیو د اړتیا وړ اوبه په ښه ډول ورسېږي، ددې تر څنک به د اوبو د ضایعاتو مخه ونیول شي او د بزګرو حاصلات به ورسره ښه شي.د نوموړې موسسې لخوا به د سیمې ځایي کارګرانو ته د کار په مقابل کي نغدې پیسې ورکول کېږي.
د هلمند ولایت کرنې ریاست له ژمنې سره سم، په کرونده کې د اوبو ښه مدیریت په موخه د هلمند مرکز لښکرګاه په ګډون په ګڼو ولسوالیو کې بېلابېلې برنامې پلي کوي، ترڅو د بزګرو د حاصلاتو په لوړېدو کي د پام وړ بهبود رامنځته شي.