د لغمان قرغیو کې ۸۶ جریبه ځمکه له غصب څخه وژغورل شوه
۱۷ سلواغه ۱۴۰۱ه.ش
۱۵ رَجَب المُرَجَّب ۱۴۴۴ ه.ق
په لغمان کې دغصب دمخنیوي او غصب شوو ځمکو داسترداد تخنیکي پلاوی قرغیو ولسوالی ته سفر وکړ او ددې سفر په ترڅ کې یې د سرخکانو دزنګورې په سیمه کې شپږ اتیا جریبه کرنیزه ځمکه دغاصبینو له منګولو څخه خلاص او په رسمي توګه یې یاده ځمکه اجاره دار ته تسلیم کړه.
دلغمان دکرنې رییس الحاج مولوي محمدولي محسن او د ځمکې دغصب مخنیوی او غصب شویو ځمکو د بېرته راګرځولو مشر وویل:«دسرخکان ودسیمې د زنګورې شپږ اتیا جریبه کرنیزه ځمکه چې په کدستري نقشو او د املاکو د اساس په دفتر کې د امارتي ځمکی په نوم ثبت ده، ددې ځمکې قرارداد په ۱۳۹۹ هجري شمسي کال د جاوید په نوم یوتن اجاره دار سره لاسلیک شوې ده، چې نوموړي اجاره دار دځمکې د دوه فصلونو دکرلوڅخه وروسته ددې سیمې څو تنو غاصبینو دځمکې ذوالید په زورواکۍ سره تر خپل تصرف لاندې راوسته او د ځمکې بې بنسټه دعوه یې په محکمه کې وکړه او اجاره دار یې دځمکې کرلو ته تردې مهاله نه پریښوده.» محسن وویل، چې په همدې موخه نن عملاٌ ټول تخنیکي پلاوی غړي نوموړې سیمي ته راغلي یو او دځمکې ذوالید مو خپل کړ او یاده اندازه ځمکه د غاصبینو له غصب څخه خلاصه او جاوید په نوم پخواني اجاره دارته په رسمي توګه تسلیم شوه.
دیادولو وړ ده چې یاد تخنیکي پلاوی فعالیتونه په لغمان ولایت کې په چټکۍ سره روان دي تر دې وړاندې یې هم د زیاتو امارتي ځمکو د تثبیت او تشخیص چارې ترسره کړي دي.
