د کندهار ریګستان کې په دوه زره مالدارانو د څارویو خوراکي توکي ووېشل شول
۱۶ سلواغه ۱۴۰۱ه.ش
۱۴ رَجَب المُرَجَّب ۱۴۴۴ ه.ق
د کندهار دکرنې، اوبولګولو او مالدارۍ ریاست د ملګرو ملتونو دخوړو او کرنې ادارې «FAO» په مالي او د «ADA» مؤسسې په تخنیکي همکارۍ ددې ولایت د ریګستان ولسوالی په دوه زره مالدارانو د څارویو خوراکي توکي وېشلي دي.
د چارواکو په خبره په دې پروسه کې د کندهار دکریګستان ولسوالی په ۲۰۰۰ مالدارانو پر هر مالدار ۲۰۰ کیلوګرامه د څارویو خوراکي توکي وېشل شوي دي.
ددې مرستې موخه ددې ولسوالی د مالدارانو ملاتړ او د مالدارۍ سکټور پیاوړتیا ده. دکندهار دکرنې ریاست چارواکي وایي، چې د څارویو د خوراکي توکو د وېش دا لړۍ ادامه لري او د کندهار نورو ولسوالیو او نورو لرو پرتو سیمو ته هم غځېږي.
باید وویل شي، چې د اسلامي امارت له راتګ سره سم په ټول افغانستان کې امن راغلی او ډېرو لرو پرتو سیمو ته چې په تېر کې له هر اړخیزو مرستو او همکاریو بې برخې ول مرستې رسېږي. د اسلامي امارت چارواکي ژمن دي، چې د کندهار د ریګستان ولسوالی لرو پرتو سیمو په څېر د هېواد ټولو لرو پرتو سیمو او هغو ځآیونو ته چې مخکې له دوی سره کومې مرستې او همکارۍ نه دي شوي، د څارویو د خوراکي توکو ترڅنګ د ګڼو نورو مرستو لمن وغځوي او د دوی د اقتصاي ودې او ځان بسیاینې په پار له دوی سره هر اړخیزې مرستې او همکارۍ وکړي.
