پکتيا کې پر۶۰۰ بڼوالو کيمياوي سرې ووېشل شوې
۱ مرغومې ۱۴۰۱ه.ش
۲۸ جمادي اﻷول ۱۴۴۴ ه.ق
د پکتيا د کرنې، اوبولګولو او مالدارۍ رياست د ملګرو ملتونو دخوړو او کرنې ادارې «FAO» په همکارۍ ددې ولايت د احمد ابا او سيدکرم ولسواليو پر ۶۰۰ تنو اړمنو بڼوالو سپينه سرې وېشلي دي.
په يادو ګټه اخيستونکو کې۳۰۰ تنه د احمدابا او ۳۰۰ تنه د سيدکرم ولسوالۍ شامل وو، چې هر بزګر ته ۲۵ کيلو ګرامه سپينه سره ورکړل شوه.
د پکتیا ولایت دکرنې ریاست د طبیعي سرچینو آمر ښاغلی مولوي زاهب الله ارسلا وايي چې د يادو سرو له توزیع څخه يې موخه د کرنې په مټ د اړمنو کورنيو د اقتصادي وضعيت ښه والی او د بڼونو د حاصل زياتوالی ده، نوموړي له بزګرانو وغوښتل چې سمه ګټه ترې پورته کړي.
دغه راز ښاغلی ارسلا بڼوالو ته د ځنګلونو د ګټو او اهميت په اړه د عامه پوهاوي ترڅنګ د ځنګلونو د قطع مخنيوي په برخه کې د امير المومنين فرمان او د وزیرانو شورا پریکړه هم دوی ته وړاندې کړ، او له بڼوالو نه یې غوښتنه وکړه چې د ځنګلو د قطع مخنیوي او ساتنې په برخه کې پوره همکاري وکړي.
