ننګرهار کې د هېواد په کچه د څاڅکي اوبوخور تر ټولو ستر سیسټم جوړېږي
۱۱ لړم ۱۴۰۱ه.ش
۷ ربیعالثانی ۱۴۴۴ ه.ق
د ننګرهار دکانال ریاست چارواکي وایي، چې د هېواد د لومړي ځل لپاره دهېواد په کچه د څاڅکي سیسټم اوبوخور(ډراپ ایرېګېشن سیستم) جوړېږي.
د چارواکو په خبره دغه پروزه د دوو کرنیزو شرکتونو له لارې د د ۱۸ میلیونه افغانیو په لګښت جوړېږي، چې ۳۲۶ جریبه کرنیزه ځمکه تر پوښښ لاندې راولي.
د ننګرهارکانال ریاست چارواکي وویل: « د ننګرهار کانال ریاست دکرنې د میکانیزه کولو او کرنې برخې ته لا زیات کار کولو په موخه مټې رانغاړلي دي، د افغانستان په کچه د ننګرهارکانال ریاست د هډې فارم پنځم بلاک کې په ۳۲۶ جریبه ځمکه د ۱۸ میلونه افغانیو په لګښت د اوبوخورد څاڅکو سیستم جوړ او په نږدې راتلونکې کې به ګټې اخستنې ته وسپارل شي.» ...
د څا څکو يا ډراپ په لارې اوبه لگول د زیاتو اوبو د ضایع کېدو مخنیوي کوي، په دې طریقې سره په کم وخت کې زيات شمېر نباتات اوبه کېداي شي، په ځانګړي توګه د هغو ونو او نباتاتو د پاره چې په کتار کرل کېږي مناسبه طريقه ده.
د څاڅکې په طريقه اوبه لگول په خاورې کې د اوبو او هوا تر منځ د مناسب انډول د ساتلو له لارې د کرنيزو نباتاتو د ودې په زياتولو، د حاصل په لوړولو او د کيفيت په ښه کولو کې د پام وړ ونډه لري.
همدارنګه د څاڅکو په طريقه اوبه لگول د نبات د پاڼو، تنې او مېوو سره د اوبو تماس کموي(پاڼې، تنې او ميوې نه لندېږي) او په نتيجه کې په ناروغيو باندې د نبات د اخته کېدو چانس کمېږي.
دغه راز کرنيز کيمياوي مواد لکه کيمياوي سرې، آ فت وژونکي ا و نورکيمياوي مواد د څاڅکې په طريقه د اوبو لگولو د لارې په ډېره اغېزمنه توگه استعمالېداى شي.
د یادو ګټو ترڅنګ د هرزه بوټو د ستونزې کمښت او د کرنیزو فعالیتونو مناسب ترسره کول ددې سیسټم نورې ګټې دي.
