کندهار کې د اوبو د یوه بند رغنیزې چارې ۸۰ سلنه بشپړ شوي دي
۲۹ زمری ۱۴۰۱ه.ش
۲۲ محرم الحرام ۱۴۴۴ ه.ق
دکرنې، اوبولګولو او مالدارۍ وزارت دکرنې او مالدارۍ مرستیال مولوی صدراعظم کندهار ولایت ته د خپل سفر ته ترڅ کې، ددې ولایت د شاه ولي کوټ ولسوالی د سوزني په سیمه کې د اوبو د یوه بند له رغنیزو چارو څخه لیدنه وکړه.
دکرنې او مالدارۍ مرستیال مولوی صدراعظم چې د یاد چکډم د چارو د اروزنې په پار شاه ولی کوټ ولسوالی ته سفر کړی؛ د کرنې وزارت د دفتر رییس ملا حسین خورشید، د اطلاعاتو او عامه اړیکو رییس مولوی مصباح الدین مستعین، د بذري تخمونو د تصدیق ورکونې رییس مولوی صدیق الله، د کورني څارنې رییس مولوی نصرت او د بوټو ساتنې رییس عبدالرحمن شېرزاد غوربندی یې ملتیا کوي.
د کندهار ولایت د شاه ولي کوټ ولسوالی د سوزني سیمې اوسیدونکو د یاد بند دجوړولو هرکلۍ کوي، او په دې سیمه کې د نورو چکډمونو د جوړولو غوښتونکي دي. د شاه ولي کوټ ولسوالی یوشمېر اوسیدونکي وایي، چې ددې بند جوړول زموږ په سیمه کې د اوبو په زیاتوالي کې رغنده رول لري او که د یاد بند په څېر نور بندونه هم جوړ شي په دې سیمه کې د اوبو د کمښت ستونزه په بشپړه توګه له منځه ځي.
ددې چکډم د جوړولو چارې نږدې څلور میاشتې وړاندې پیل شوې وې، چې د ځمکې لاندې اوبو د زیاتوالی او د اوبو د ضایعاتو د مخنیوي په پار جوړېږي، چې دمګړۍ یې رغنیزې چارې نږدې ۸۰ سلنه بشپړ شوي دي.
