د پکتيا دکرنې رياست: د Healtho مؤسسې په دوو ولسواليو کې د کانالونو د بيارغونې پروژې پيلوی
۲۰ زمری ۱۴۰۱ه.ش
۱۳ محرم الحرام ۱۴۴۴ ه.ق
د پکتيا ولايت د کرنې، اوبولګولو او مالدارۍ رياست په مقام کې د Healtho مؤسسې چارواکو د پکتيا دکرنې رياست له رئیس ښاغلي الحاج مولوي عبدالروف سعيد سره د همغږۍ ناسته ترسره کړه.
په ياده ناسته کې، د Healtho مؤسسې چارواکو د زرمت او سيدکرم په ولسواليو کې د خپلو راتلونکو پروژو په اړه مفصل معلومات د کرنې له رياست سره شريک کړل، دوی وويل؛ په پام کې لري چې په يادو ولسواليو کې د کار په مقابل کې د خوړو د ورکړې تر سرليک لاندې د کانالونو د بيارغونې پروژې پلي کړي.
د پکتيا د کرنې رئیس ښاغلی مولوي سعيد په خپلو خبرو کې د يادې مؤسسې له چارواکو سره د همکارۍ د ژمنې ترڅنګ د يادې مؤسسې له چارواکو وغوښتل، چې خپلې چارې د کرنې رياست سره په همغږۍ په پوره شفافيت سرته ورسوي.
نوموړي همداراز وويل، چې د يادو پروژو په پلي کېدو سره به د کاري فرصتونو ترڅنګ د اوبولګونې په برخه کې اسانتياوې هم رامنځته کړي.
