پکتيا کې د اوبو ۶۱ زېرمې جوړېږي
د پکتيا د کرنې، اوبولګولو او مالدارۍ ریاست وايي په دې ولايت کې د اوبو مديريت او کروندګرو او مالدارونوته د کافي اوبو برابرولو په پار د پکتيا ولايت د کرنې، اوبولګولو او مالدارۍ رياست اړوند د ځمکې او ځنګلونو د تلپاتې مدیریت پروژې له لورې د احمد ابا او سيدکرم په ولسواليو کې د اوبو ۶۱ زېرمې جوړېږي.
د چارواکو په خبره ددغو زېرمو له ډلې څخه يې ۴۸ د سيدکرم او ۱۳ يې د احمد ابا په ولسوالی کې جوړېږي، چې ټولیز ارزښت يې اتلس میلیونه افغانۍ ده او چارې به يې د درو مياشتو په جريان کې بشپړې شي.
د يادو زېرمو د چارو د پيل په موخه د قراردادي شرکت مسولينو او تخنيکي انجنيرانو د د پکتيا دکرنې رياست د طبيعي سرچينو آمر ښاغلي مولوي احسان الله احسان سره د همغږۍ په ناسته کې د کارونو پر پيل او د پروژې په څرنګوالي خبرې وکړې.
ښاغلي احسان د شرکت له مسولينو وغوښتل چې د خپلې چارې په لوړ کيفيت د قرارداد شرايطو ته په کتو سرته ورسوي.
د پکتيا دکرنې رياست د طبيعي سرچينو آمر د يادو پروژو د پلي کولو په پار د هراړخيزو همکاريو ډاډ ورکړل.
