د لغمان دکرنې ریاست: د الینګار په ولسوالی کې د اوبولګولو چکډم له پروژې څخه څارنه وشوه
۲۹ چنګاښ ۱۴۰۱ ه.ش
۲۱ ذوالحجَّة ۱۴۴۳ ه.ق
د کرنې، اوبولګولو او مالدارۍ وزارت له خوا د لغمان ولایت د الینګار ولسوالی بزګرانو ته د اسانتیاوو برابرولو په پار د اوبولګولو د یو چکډم د جوړولو چارې روانې دي.
دلغمان دکرنې، اوبولګولو او مالدارۍ رییس مولوی محمدولي محسن ددې پروژې له کاري بهیر څخه د لیدنې په ترڅ کې وویل، چې یاد چکډم د الینګار ولسوالی د سنګر په سیمه کې جوړېږي، چې ۷ متره لوړوالی، ۳ متره سور او ۱۶۰ متره اوږدوالی او د ۱۲۰ مترمکعب اوبو د زېرمه کولو وړتیا لري.
دغه چکډم د الینګار ولسوالی د سنګر کلي ۱۰ زره جریبه ځمکه خړوبوي. یاد چکډم د کرنې وزارت له خوا د کار په بدل کې د خوړو پروژې له لارې جوړېږي.
د لغمان دکرنې رییس له یادې پروژې څخه دلیدنې په ترڅ کې د يادې پروژې اړوندو چارواکو ته لارښوونه وکړه، چې د کارونو کيفيت او کميت ته ځانګړې پاملرنه وکړي.
ښاغلي محسن د سنګر سيمې له ولسونو وغوښتل، چې د نوموړې پروژې کارونه په اخلاص سره ترسره کړي او له چارواکو سره هر اړخيزه همکاري وکړي.
د لغمان ولایت د کرنې، اوبولګولو او مالدارۍ ریاست چارواکي وایي، چې ددې پروژې په پلي کېدو سره به د باران اوبه کنټرول شي او د ځمکې د سطحې پر اوبو به هم ښه اغیز ولري، ددې ترڅنګ د کاریزونو او څاګانو په اوبو به هم اغېز کوي د کوچیانو مالونو ته هم اوبه چمتو کوي او د خاورې د تخریب مخه نیسي.
