پکتیا کې د ځنګلوالۍ پر ۵۰ ټولنو لمریز پخلنځي ووېشل شول
۲۹ چنګاښ ۱۴۰۱ ه.ش
۲۱ ذوالحجَّة ۱۴۴۳ ه.ق
د پکتیا د کرنې، اوبولګولو او مالدارۍ ریاست وایي، چې په دې ولایت کې د ځنګلونو د پرېکېدو د مخنیوي او چاپېریال ساتنې په پار دیاد ولایت د مرکز ګردیز، احمد خېلو او ډنډپټان ولسوالیو د ځنګلوالۍ د ۵۰ ټولنو پر لمریز پخلنځي ووېشل شول.
دغه لمریز پخلنځي د کرنې ریاست اړوند د اړیکو دفتر له خوا پر یادو کورنیو وېشل شوي دي.
د وېش په مراسمو کې د پکتیا د کرنې، اوبولګولو او مالدارۍ ریاست سرپرست مولوي احسان الله احسان، د کرنیزو چارو آمر ښاغلي مومند خروټي، د اړیکو دفتر مسئولینو او د ځنګلوالۍ ټولنو غړو ګډون کړي وو.
د پکتیا دکرنې سرپرست رییس مولوی احسان الله احسان په خپلو خبرو کې وویل، چې د یادو لمریزو پخلنځیو څخه په سمه توګه استفاده وکړئ او له خلکو یې وغوښتل، چې د ځنګلونو په ساتنه کې پوره ونډه واخلي. هغه له خلکو وغوښتل، چې یاد پخلنځي ترویج کړي، ترڅونور خلک هم ګټه ترې واخلي.
باید وویل شي، چې له لمریزو پخلنځیو څخه ګټه پورته کول د طبیعي ځنګلونو د خوندي کولو ترڅنګ د چاپېریال په ساتنه او د شین کوریزو ګازونو د کچې په ټېټولو کې رغنده رول لري.
