لغمان کې پر ۱۳۵۰ بزګرانو د کورنیو باغچو اړونده توکي وېشل کېږي

۱۲ چنګاښ ۱۴۰۱ ه‍.ش
۴ ذوالحجَّة ۱۴۴۳ ه‍.ق
د لغمان د کرنې، ابولګولو او مالدارۍ ریاست د «ABBRAR» مؤسسې په همکارۍ ددې ولایت د عليشنګ ولسوالی پر یوشمېر بزګرانو د کورنیو باغچو او مالدارۍ اړونده توکي وېشلي دي.
د کورنیو باغچو او مالدارۍ اړونده دا توکي د غیر موسمي سبو د تولید، بزګرانو ته د کارموندنې، او د خوراکي تنوع په پار پر دغو بزګرانو وېشل شوي دي.
د کورنیو باغچو په وېشل شویو توکو کې بېلچې، کشک، رمبې، او د یوشمېر سبو تخمونه شمال دي. دغه راز د مالدارۍ په کېټونو کې بوس، کونجاړه او درمل شامل دی.
د لغمان دکرنې ریاست چارواکي وایي، چې د دغو توکو له  وېشلو څخه موخه، د غیرموسمي سبو کښت او تولید دي چې، په عملي کېدو سره یې بزګرانو ته د کار زمینه برابره او د دوی د کورنیو د اقتصادي ودې لامل کېږي.
سربېره پر دې، چې دغه کورني باغچې د بې وزلو بزګرانو لپاره د عاید ښه سرچینه ده، په کورنیو کې د خوراکي تنوع ښه عامل هم کڼل کېږي.
له دغو توکو او تخمونو څخه برخمن شویو بزګرانو ته په کورنیو باغچو کې د سبو کرکېلي او پالنې په پار روزنې هم ورکړل شوي دي.