دکرنې وزير دلغمان په ولايت کې د ډاکټر عبدالوکيل څېړنيز فارم څخه ليدنه وکړه
۱ ليندۍ ۱۴۰۰ هـ.ش
۱۶ ربیع الثاني ۱۴۴۳ هـ.ق
دکرنې، اوبولګولو او مالدارۍ وزير مولوی عبدالرحمن راشد او ددې وزارت د اوبولګولو او طبيعي سرچينو مرستيال مولوی شمس الدین شریعتي د لغمان په ولايت کې د ډاکټر عبدالوکيل له ترويجي او څېړنيز فارم څخه ليدنه وکړه.
دکرنې، اوبولګولو او مالدارۍ وزير د ياد فارم د ودې او پراختيا په پار اړوندو چارواکو ته لازمې سپارښتنې وکړې او ددې فارم د وضعيت د لاښه کېدو ژمنه يې وکړه.
دلغمان دکرنې رئیس مولوي محمد ولي محسن په دې فارم کې د فعاليتونو په هکله مالومات وړاندې کړه او ويې ويل: "
د عبدالوکيل فارم په هېواد کې له سترو څېړنيزو فارمونو څخه دی، چې په وروستيو څو کالونو کې په دې فرم کې د عنابو، مالټې، نارنج، زیتون، لیمو، پستې، بیر او ناکو زرکونه نيالګي توليد او پالل کېږي".
دا فارم په هېواد کې د بارزښتو مېوو د ترويج او څېړنې په پار نږدې ۱۱کاله مخکې د کابل-لغمان د عمومي سړک خواته په ۸۷جريبه ځمکه جوړه شوې ده.
