د ځنګلونو د غير قانوني پرېکېدو او د لرګيو قاچاق دمخنوي پر طرحه د کرنې په وزارت کې مشورتي غونډه دائره شوه
۳۰ لړم ۱۴۰۰ هـ.ش
۱۵ ربیع الثاني ۱۴۴۳ هـ.ق
دکرنې، اوبولګولو او مالدارۍ وزارت د اوبولګولو او طبيعي سرچينو مرستيال مولوی شمس الدين شريعتي په رهبرۍ او د کورنيو چارو وزارت، ماليې، صنعت او سوداګرۍ او استخباراتو د استازو په شتون کې د هېواد د ځنګلونو د غير قانوني پرېکېدو او د لرګيو قاچاق دمخنوي دطرحې چمتو کولو په پار دکرنې په وزارت کې غونډه دائره شوه.
په دې غونډه کې پر بېلابېلو مواردو له ډلې د ځنګلونو د پرېکېدو او دلرګيو قاچاق دمخنيوي، د سون لرګيو او چارتراش لرګيو قانوني سوداکري په پار خبرې وشوې تر څو په طرحه کې ځای پرځای شي او تر بشپړېدو وروسته د کابينې غونډې ته وړاندې شي.
دکرنې وزارت د اوبولګولو او طبيعي سرچينو مرستيال مولوی شمسالدین شریعتي د ځنګلونو د بېرحمانه پرېکېدو او د دولت د پرېکړې په هکله حاضرينو ته وويل:" اسلامي امارت دلرګيو قاچاقبرانو او د افغانستان سيمه ييزو ځنګلونو پرېکوونکو سره جدي چلند کوي، په همدې موخه د دولت مشرتابه پرېکړه کړې ده، چې دکرنې وزارت د غصب شويو ځمکو د بېرته راګرځولو او د هېواد د سيمه ييزو ځنګلونو د ساتنې په پار ۴۰۰کسيزه نظامي قطعه ايجاد کړي".
ديادونې وړ ده، د افغانستان د وروستيو څلور لسيزو تحولاتو کې ځنګلونه په بېرحمانه ډول پرې او قاچاق شوي دي. د اوس لپاره حکومت د ځنګلونو پرېکول او قاچاق بند کړي دي. ددې طرحې تر بشپړېدو وروسته د ځنګلونو د پرېکولو د مخنيوي او لرګيو څخه د ګټې اخيستنې په موخه غوره ميکانيزم په پام کې نيول کېږي.
