دکرنې وزارت مشرتابه افغانستان لپاره د ترکيې ۷۷ ودانيز شرکت مسؤل سره وليدل
۱۳/صفر/۱۴۴۳هـ.ق
۲۹/وږی/۱۴۰۰هـ.ش
د ا.ا.ا د کرنې، اوبولګولو او مالدارۍ وزارت سرپرست محترم مولوی عبدالرحمن راشد او مرستیال محترم مولوی فضل ربي فضلي افغانستان لپاره د ترکيې ۷۷ ودانيز شرکت مسؤل براق انسال سره وليدل.
په دې ليدنه کې د دواړو خواوو ترمنځ د دوه اړخيزو مرستو ژمنه وشوه. او د ا.ا.ا د کرنی وزارت سرپرست په خپلو خبرو کې وویل، چې افغانستان د اقتصاد له نظره له زیاتو ستونزو سره لاس او ګریوان دی او د بېوزلۍ په ټيټه کچه کې قرار لري.
هغه وويل:"موږ د ترکیې هېواد څخه غواړو تر څو له افغانستان سره هر اړخیزو مرستو ته دوام ورکړي او خپلې پروژې په ځانګړي ډول د کرنې په برخه کې عملي کړي".
براق انسال په خپلو خبرو کې وویل، چې موږ د افغانستان سره د هر ډول همکاریو ژمنه کوو، او د افغانستان سره به د ورور هېواد په څېر مرسته او همکارۍ وکړو.
په همدې حال کې د ا.ا.ا د کرنې وزارت مرستیال مولوی فضل ربي فضلي وویل، افغانستان د سوداګرۍ له نظره له ستونزو سره مخ دی، یوازینۍ لاره چې پرې اتکا لري هغه کرنه ده.
ښاغلی فضلي وويل، چې موږ د ترکیې هېواد څخه غواړو تر څو له موږ سره د کرنې په برخه کې پوره همکاري وکړي. هغه دغه راز د ياد شرکت مسؤل ته د پوره امنيت ډاډ ورکړ.
