نورستان کې په ۳۶۰ بزګرو مېرمنو د کورنیو باغچوجوړولو توکي او د سبو تخمونه وویشل شول

۲۰ چنګاښ ۱۴۰۰
د نورستان ولایت د کرنې، اوبولګولو او مالدارۍ ریاست چارواکي وایي، چې د یاد ولایت په ۳۶۰ بزګرو مېرمنو د کورنیو باغچو جوړولو په پار اړین توکي او د ډول ډول سبو تخمونه وېشلي دي.
د نورستان د کرنې ریاست چارواکي وایي، چې د مېرمنو د اقتصادي پیاوړتیا په موخه یې ۳۶۰ مېرمنو ته د کورنیوباغچو توکي او ترڅنګ یې د ډول ډول سبو لکه «ګندنې، پیازو، سرې مولۍ، بادرنګو او بینډیو» تخمونه وېشلي، چې له دې لارې به اړمنې مېرمنې وکولای شي خپلې کورنۍ اړتیاوې پوره کړي.
له دغو توکو او تخمونو څخه برخمن شویو مېرمنو ته په کورنیو باغچو کې د سبو کرکېلي او پالنې په پار روزنې هم ورکړل شوي دي.
دغو وېشل شویو کورنیو باغچو څخه موخه خوراکي خوندیتوب رامنځته کول، د کلیوالو بېوزلو کورنیو اقتصادي وده، د بېوزلۍ کچه ټېټول او مېرمنو لپاره د کار زمینې برابرول دي.