کرنې سکټور سره د جاپان د ملاتړ د دوام په پار د جايکا چارواکو سره دکرنې وزير کتنه
۱۶ چنګاښ ۱۴۰۰
دکرنې، اوبولګولو او مالدارۍ وزير د جاپان د نړيوالې همکاريو ادارې(JICA) مسوول زوسینک، او همکارونو سره يې د افغانستان کرنې سکټور سره د جاپان د ملاتړ پر دوام خبرې وکړې.
دکرنې، اوبولګولو او مالدارۍ وزير ډاکټر انوار الحق احدي په دې کتنه کې د افغانستان کرنې سکټور سره د جاپان له ملاتړ او مرستو څخه د قدردانۍ او مننې ترڅنګ وويل، چې د جاپان هېواد افغان زده کړيالانو ته اغېزناکې بورسيې ورکړي دي او غوره کدرونه په ځانکړې توګه دکرنې په برخه کې يې غوره کدرونه روزلي دي. هغه دغه راز د هېواد د کرنې سکټور سره د جاپان د ملاتړو د دوام غوښتنه وکړه.
په دې کتنه کې، د جايکا چارواکو وويل، چې د تحصيلي او بورسيو ورکړې، استراتيژۍ او پاليسي جوړونې، خصوصي سکټور څخه ملاتړ ، باکيفيته توليداتو څخه ملاتړ او د زېربناوو په برخوکې خپل فعاليتونو ته دوام ورکوي. هغوی د کرنې وزير څخه د داسې طرحې د چمتوکولو غوښتونکي شول، چې پر بنسټ يې جاپان د کرنې سکټور سره خپل ملاتړ ته دوام ورکړي.
