میدان وردګو ولایت کې د واټر شیډ جوړولو تړون لاسلیک شو

۷ چنګاښ ۱۴۰۰
د میدان وردګو ولایت د کرنې، اوبولګولو او مالدارۍ ریاست وایي، چې د کرنې وزارت د کرنې او خوړو خوندیتوب بېړنۍ پروژې (EAST) او ددې ولایت د قلعه ولایت شورا ترمنځ د آبریزې (واټرشېډ) جوړولو تړون لاسلیک شوی دی.
د میدان وردګو ولایت د کرنې ریاست چارواکي وایي، یاد واټر شیډ، چې د کرنې ریاست تر چتر لاندې د کرنې او خوړو خوندیتوب بېړنۍ پروژې له خوا جوړېږي، په جوړېدو سره یې د اوبو جذب، د سېلابونو د زیانونو مخنیوی، د سیمې ښکلا او زرغونتیا ته د زمینې برابرولو ترڅنګ خلکو ته کاري فرصتونه هم برابروي.
 دغه راز ددې پروژې له لارې په یاده سیمه کې د مېوه لرونکو او بې مېوې ونو ۶۷۶۸ نیالګي هم کېنول کېږي.
ددې پروژې ټولیز لګښت ۳.۷ میلیونه افغانۍ ده، چې د نړیوال بانک له خوا تمویل او په څلورو میاشتو کې بشپړېږي.
باید وویل شي، چې ددې پروژې په پلي کولو کې د سیمې یوشمېر اوسیدونکو ته د کار زمینه هم برابرېږي.