سرپل کې د سبو ۳۲۰ کورني باغچې جوړېږي
۷ چنګاښ ۱۴۰۰
د سرپل ولایت د کرنې، اوبولګولو او مالدارۍ ریاست، په دې ولایت کې د ۳۲۰ کورنیو باغچو د جوړېدو خبر ورکوي.
یاد ریاست وایي، چې دغه کورني باغچې د کرنې او خوړو خوندیتوب بېړنۍ پروژې (EATS) په همکارۍ جوړېږي.
د سرپل دکرنې ریاست وایي، چې ددغو کورنیو باغچو د جوړولو په پار د روان کال په ترڅ کې د سرپل ولایت په مرکز کې د مېرمنو اقتصادي ځان بسیاینې په پار په ۱۲۰ اړمنو او کروندګرو مېرمنو د اووه ډوله سبو تخمونه چې په کې رومي بانجان، توربانجان، بېنډۍ، پالک، توری، کاهو او پیاز شامل دي وېشل شوي دي.
ټاکل شوې، چې د سرپل ولایت د کلیو په پراختیایي شوراګانو کې په شاملو ۲۰۰ نورو مېرمنو هم د کورنیو باغچو جوړولو په پار د سبو تخمونو د وېش لړۍ پیل شي.
