اداري غونډه کې د پراختیایي بودیجې پر لګولو ټینګار
![اداري غونډه کې د پراختیایي بودیجې پر لګولو ټینګار](https://www.mail.gov.af/sites/default/files/2021-05/1_1.jpg)
۲۹ غویی ۱۴۰۰
د کرنې، اوبولګولو او مالدارۍ وزارت په اداري غونډه کې د پراختیایي بودیجې پر لګولو ټینګار وشو.
دا غونډه نن د کرنې وزارت سرپرست او د اوبولګولو او طبیعي سرچینو مرستیال حشمت الله غفوري په مشرۍ، د کرنې او مالدارۍ مرستیال شېرشاه امیري او د ریاستونو او پروژو د رییسانو په شتون کې په لاره واچول شوه، چې په ترڅ کې یې د ۱۴۰۰ مالي کال د پراختیایي بودیجې پر لګولو خبرې وشوې.
ښاغلی غفوري د غونډې ګډونوالو ته سپارښتنه وکړه، چې په مرکز او ولایتونو کې دې د پراختیایي پروژو د عملي کېدو چارې کړندۍ کړي.
د اوبولګولو او طبیعي سرچینو مرستیال دغه راز وویل، چې د قراردادونو او دواطلبیو د پلي کېدو په لړۍ او د پراختیایي پروژو د عملي چارو په پیل کې خنډ او ځنډ د منلو نه دي او په مرکز او ولایتونوکې دې پراختیایي پروژې په چټکۍ سره پلي شي.
په دې غونډه کې ښاغلی غفوري دکرنې وزارت د تدارکاتو په لړۍ کې یوشمېر ستونزو ته هم اشاره وکړه او ویې ویل، چې باید ژر دا ستونزې هوارې شي ترڅو د پراختیایي پروژو په پلي کېدو کې خنډ منځته را نه شي.