د کرنې وزارت او ملي تدارکاتو ادارې ترمنځ همکارۍ او همغږۍ لا پیاوړي کېږي
۷ وری ۱۴۰۰
د کرنې، اوبولګولو او مالدارۍ وزارت د اوبولګولو او طبیعي سرچینو مرستیال حشمتالله غفوري او د کرنې او مالدارۍ مرستیال شېرشاه امیري، د ملي تدارکاتو ادارې مرستیال ویس رحیمي سره وکتل او د دواړو ادارو ترمنځ د همغږیو او همکاریو پر پراختیا یې خبرې وکړې.
په دې لیدنه کې، چې دکرنې وزارت او د ملي تدارکاتو ادارې یوشمېر رییسانو هم ګډون درلود، د ټولنو او هغو شرکتونو چې د حیواني او کرنیزو محصولاو د پروسس او تولید په برخه کې فعالیت کې پر وړتیالوړنې او دغه راز د دغو شرکتونو او ټولنو د ښه ارزونې په پار د یوې ځانګړې میکانیزم پر جوړولو خبرې اترې وشوې.
د ملي تدارکاتو ادارې مرستیال ویس رحیمي، په دې لیدنه کې د ملي تدارکاتو له ادارې سره د کرنې وزارت د همغږیو او همکاریو په پار خوښي څرګند کړه او ددې لړۍ پر چټکتیا یې ټینګار وکړ.
ښاغلی رحیمي د کرنې له وزارت څخه وغوښتل، چې د ملي تدارکاتو غوښتنې سره سم دې، په اړوندو برخو کې د اړتیا وړ شمېرې ولېږي ترڅو دا لړۍ په چټکتیا سره ترسره شي.
په همدې حال کې د کرنې وزارت د اوبولګولو او طبیعي سرچینو مرستیال حشمتالله غفوري په دې لیدنه کې وویل: «د ولسمشر د سپارښتنې پر اساس، د ملي تدارکاتو په قراردادونوکې کورنیو تولیداتو ته لومړیتوب ورکول کېږي او موږ یوه قانوني مسوده جوړه کړې ده، چې پر بنسټ یې د کلیو په کچه انجمنونو او د ولسوالیو په کچه د ولسوالیو ټولنې جوړې کړي او په همدې توګه د ولایت په کچه ولایتي ټولنه او له ولایتي ټولنې وروسته یوه ملي ټولنه جوړه شي، چې په دغو ټولنو کې، د سبو، حبوباتو، غلودانو، مېوو او لبنیاتو سکټورونه شامل دي.»
ښاغلی غفوري زیاته کړه، چې ددغو ټولنو څخه په استفادې سره کولی شو، چې د بزګرانو ملاتړ وکړو او ددغو ټولنو له لارې، چې د ملي تدارکاتو اداره ورته قرارداد ورکوي، د بزګرانو واقعي تولیدات وپلورل شي.
حشمتالله غفوري د کروندګرو مېرمنو د ټولنې د جوړېدو خبره هم وکړه او د ملي تدارکاتو ادارې څخه یې وغوښتل، چې د کرنیزو محصولاتو اړوند په ملي قراردادونو کې دې مېرمنو ته لومړیتوب ورکړي.
دغه راز د کرنې وزارت د کرنې او مالدارۍ مرستیال شېرشاه امیري د ملي تدارکاتو ادارې سره د کرنې وزارت پر اغېزناکو همکاریو خبرې وکړې او وویل، چې د کرنې وزارت په دې برخه کې د ملي تدارکاتو ادارې سره همکار دی او د کرنې په وزارت کې د نویو رییسانو په ګمارنې سره دا هکمارۍ ډېرې شوي دي او ګړندۍ کېږي.
