بادغیس کې د تېلي نباتاتو ۲۶ کروندې جوړېدل او د نویو بوټو پېژندل

۱۲ کب ۱۳۹۹
د بادغیس د کرنې، اوبولګولو او مالدارۍ ریاست په دې ولایت کې دتېلي نباتاتو د کرکېلي د پراختیا او د تولید زیاتوالي په پار د تېلي نباتاتو ۲۶ ننداریزې کروندې جوړوي. یاد ننداریزې کروندې، چې په کې زغر، ممپلۍ، لمرګل او کونځلې شاملې دي، هر یوه یې په نیم جریبه اوبیزه ځمکه کې جوړېږي.
د دغو ننداریزو کروندو د جوړولو موخه د صنعتي نباتاتو دودول او دغه راز د نویو بوټو له ډلې د زغر او ممپلیو پېژندل دي، چې تر دې دمه بزګران د یادو نباتاتو له کرکېلي او تولید سره بلد نه دي.
د یادو ننداریزو کروندو په جوړولو سره، د برخمن شویو بزګرانو ترڅنګ نور بزګران هم کولی شي، چې د یادو بوټو د کرکېلي او روزنې لارې چارې زده کړي.
یاد ننداریزې کروندې په داسې حال کې جوړېږي، چې تر دې وړاندې د بادغیس کرنې ریاست له خوا د روزنیزو پروګرامونو په لاره اچولو سره ۹۵ سلنه لېوال بزګران په خپلو ځمکو کې د تېلي نباتاتو د کرکېلي او حاصل ټولولو په پرخه کې روزل شوي دي.
د بادغیس په ولایت کې د تېلي نباتاتو کرکېله لرغونې مخینه لري، له یادو نباتاتو څخه تولید شوې غوړې، په دودیزه بڼه پروسس کېږي.
د بادغیس د کرنې، اوبولګولو اومالدارۍ ریاست په پام کې لري، چې د منظمو ترویجې او تشویقي برنامو په لاره اچولو سره په دې ولایت کې د یاد ارزښت لرونکو نباتاتو د تولید او پروسس صنعت پیاوړي کړي.