ننګرهار کې د اوبولګولو ۲۲ کانالونه ګټې اخیستنې ته وسپارل شول
۲۷ غبرګولی ۱۳۹۸
د کرنې، اوبولګولو او مالدارۍ وزارت د اوبولګولو او طبیعي سرچینو مرستیال حشمت الله غفوري ننګرهار ولایت ته د خپل سفر په ترڅ کې د اوبولګولو ۲۲ کانالونه چې د جوړولو چارې یې بشپړ شوي دي ګټې اخیستنې ته وسپارل.
له دغو کانالونو څخه څلور یې د ننګرهار ولایت په کوز کنړ او پاتې نور یې ددې ولایت په سرخرود، خوګیاني، ګوشتې، کامه، دره نور او رودات ولسوالیو کې شتون لري. دغه کانالونه چې ټولیز لګښت یې ۱۵۰ میلیونه افغانۍ ده د رغولو چارې یې په ۱۳۹۷ یم کال کې پیل او له بشپړېدو سره سم ګټې اخیستنې ته وسپارل شول.
د دغو کانالونو رغول ددې ترڅنګ، چې د اوبو د ضایعاتو مخه نیولي دي د کانالونو تر پوښښ لاندې ځمکو د حاصلاتو د ډېر والي لامل هم کیږي.
په ورته وخت کې، د کرنې وزارت د اوبولګولو او طبیعي سرچینو مرستیال حشمت الله غفوري د زیتونو د پروسس له فابریکې، د خورما بڼونو، د غوا ساتنې له فارم او له یوشمېر نورو کرنیزو ځاینو څخه هم لیدنه وکړه. د کرنې وزارت د اوبولګولو اوطبیعي سرچینو مرستیال حشمت الله غفوري د ننګرهارکانال اړوندو چارواکو ته لارښوونه وکړه، چې دیاد کانال د نیمګړتیاوو او ستونزو هوارولو حل لاره دې په خپل پلان کې ځای پرځای او د مدیره هیئت په راتلونکي غونډه کې د یاد کانال د بورډ غړو او چارواکو ته وړاندې کړي.
