هلمند کې ۴۱۴ کورنیو سره د خوراکي توکو مرسته وشوه
![هلمند کې ۴۱۴ کورنیو سره د خوراکي توکو مرسته وشوه](https://www.mail.gov.af/sites/default/files/2020-12/whatsapp_image_2020-12-28_at_3.12.58_pm.jpeg)
۸ مرغومې ۱۳۹۹
دهلمند دکرنې، اوبولګولو او مالدارۍ ریاست په همکارۍ د خوړو نړیوال پروګرام «WFP» له خوا ددې ولایت ۴۱۴ کورنیو سره د خوراکي توکو مرسته وشوه.
د هلمند د کرنې رییس زلمی الکو وایي، چې له دغو مرستو څخه برخمن شوي ۴۱۴ کورنۍ هغه کورنۍ دي، چې د انارباغ قوریې او بولان طبیعي ځنګل کې یې کار کړي وو، چې دکار په بدل کې یادو کورنیو ته خوراکي توکي ورکړل شول.
د ښاغلي الکو په خبره یاد ۴۱۴ کورنیو هرې کورنۍ ته ۱۰۰ کیلو ګرامه اوړه، ۱۲ کیلو ګرامه دال، لس کیلو ګرامه غوړي او یوه کیلو مالګه ورکړل شوي دي.
د هلمند دکرنې رییس زلمي الکو وویل، چې دا لړۍ تر شپږو میاشتو پورې ده او هره میاشت به دغه خلک، چې د انار باغ قوریه او طبیعي ځنګل کې کار کوي د کار په بدل کې خوراکي توکي تر لاسه کوي.
د ښاغلي الکو په خبره ددې ترڅنګ چې د انارباغ په قوریه کې سلګونو کسانو ته د کارزمینه برابره شوې ده، راتلونکی کال به له یادې قوریې څخه زرګونه مثمر او غیر مثمر نیالګي هم تولید شي.