کندهار کې د کورنیو تولیداتو نندارتون

۸مرغومې ۱۳۹۹
د کندهار د کرنې، اوبولګولو او مالدارۍ ریاست، ددې ولایت د سوداګرۍ او صنایعو خونې او خصوصي سکټور له خوا په دې ولایت کې د «خپل هېواد خپل تولید» تر عنوان لاندې د کورنیو تولیداتو درې ورځنۍ نندارتون په لاره اچول شوې ده.
د کندهار د کرنې رییس سید حفیظ الله سیدي وایي، چې په یاد نندارتون کې د کندهار، کابل، ننګرهار، مزارشریف، هرات، زابل او غزني ولایتونو تولیدي کورني محصولاتو په ۸۰ غرفو کې نندارې ته وړاندې شوي دي.
ددې نندارتون موخه کورنیو تولیداتو ته  په ملي او نړیواله کچه د پلورمارکېټ پیداکول دي.
ښاغلی سیدي ددې نندارتون موخه کورنیو تولیداتو او محصولاتو ته بارازموندنه او مارکیټ سره د تولیدوونکو بلدتیا په ګوته کړه. هغه وویل: «ددې نندارتون موخه کرنیزو محصولاتو او کورنیو تولیداتو ته بازار موندنه او د بزګرانو او تولیدوونکو اقتصادي وده ده.»
د حفیظ الله سیدي په خبره اټکل کیږي، چې په دې نندارتون کې به د میلیونونو افغانیو په ارزښت کورني تولیدات وپلورل شي او تولیدوونکو ته د پېر-پلور د هوکړې زمینې هم برابرې شي.