بادغیس کې د ځنګلونو خوندي کولو په پار زر ګرزند اصلاح شوي نغري ووېشل شول
۲۵ لیندۍ ۱۳۹۹
د بادغیس د کرنې، اوبولګولو او مالدارۍ ریاست وایي، چې په دې ولایت کې د ځنګلونو د پرېکېدو د مخنیوي او چاپېریال ساتنې په پار دیاد ولایت د آب کمري ولسوالۍ د ځنګلوالۍ د ټولنو پر زرو غړو اصلاح شوي ګرزنده نغري ووېشل شول.
دغه اصلاح شوي نغري د کرنې وزارت اړوند د ځمکې او ځنګلونو د تلپاتې مدیریت پروژې (GEF) له خوا د ملګرو ملتونو د خوړو او کرنې ادارې « FAO»په مرسته پر یادو کورنیو وېشل شوي دي.
دغه نغري په داسې حال کې وېشل شوي، چې په دې وروستیو پنځو لسیزو کې د بادغیس د پستې طبیعي ځنګلونه نږدې ۶۰ سلنه یې د سون توکو لپاره پرې شوي دي.
باید وویل شي، چې له اصلاح شویو نغریو څخه ګټه پورته کول د طبیعي ځنګلونو د خوندي کولو ترڅنګ د چاپېریال په ساتنه او د شین کوریزو ګازونو د کچې په ټېټولو کې رغنده رول لري.
