کونړ کې پر یوشمېر بزګرانو د غنمو اصلاح شوي تخمونه او کیمیاوي سرې وېشل کیږي
۹ لیندۍ ۱۳۹۹
دکونړ د کرنې، اوبولګولو او مالدارۍ ریاست وایي، چې د ملګرو ملتونو د خوړو او کرنې ادارې «FAO» په همکارۍ ددې ولایت په درېوو ولسوالیو «شیګل، وټه پور او نورګل» کې پر دوه زره بزګرانو د غنمو د اصلاح شویو تخمونو او کیمیاوې سرو د وېش لړۍ پیل شوی دی.
د کونړ ولایت د کرنې چارسمبال رییس نجیب الله عادل وویل، چې دغه اصلاح شوي تخمونه او کیمیاوي سرې د ملګرو ملتونو د خوړو او کرنې ادارې «FAO» په مالي مرسته د شیګل، وټه پور او نورګل ولسوالیو پر دوه زره بزګرانو سره وېشل کیږي، چې تر دې دمه د شیګل او نورګل ولسوالیو پر ۱۴۰۰ بزګرانو ۱۴۰ ټنه کیمیاوي سرې وېشل شوي دي.
د ښاغلي عادل په خبره په دې لړۍ کې د یادو ولسوالیو پر دوه زره بزګرانو د غنمو ۱۰۰ ټنه اصلاح شوي تخمونه او ۲۰۰ ټنه کیمیاوي سرې وېشل کیږي.
ددغو مرستو موخه د بزګرانو ملاتړ او په دې ولایت کې د غنمو د حاصلاتو زیاتول دي.
