کونړ کې پر ۶۰۰ بزګرانو اصلاح شوي تخمونه او د کورنیو باغچو اړونده توکي ووېشل شوې
۲۱لړم ۱۳۹۹
دکونړ د کرنې، اوبولګولو او مالدارۍ ریاست وایي، چې ددې ولایت پر ۳۵۰ بزګرانو د غنمو اصلاح شوي تخمونه او کیمیاوې سرې او پر۲۵۰ کروندګرو مېرمنو د کورنیو باغچو اړونده توکي او د سبو تخمونه وېشل شوي دي.
د کونړ ولایت د کرنې چارسمبال رییس نجیب الله عادل وویل، چې دغه مرستې د خوړو نړیوال پروګرام «WFP» په مالي مرسته د کونړ د مرکز په ګډون ددې ولایت په سرکاڼو، نرنګ او خاص کونړ ولسوالیو کې وېشل شوي دي.
د ښاغلي عادل په خبره په دې لړۍ کې پر ۳۵۰ تنه بزګرانو هر یوه بزګر ته ۵۰ کیلو د غنمو اصلاح شوي تخم، ۵۰ کیلو توره او ۱۰۰ کیلو یوریا سرې وېشل شوي دي. ددې ترڅنګ پر ۲۵۰ کروندګرو مېرمنو د کورنیو باغچو د جوړولو اړونده توکي او د سبو تخمونه هم وېشل شوي دي.
ددغو مرستو موخه د بزګرانو ملاتړ او په دې ولایت کې د غنمو د حاصلاتو زیاتوالي او ترڅنګ یې په کور دننه مېرمنو ته د کار د زمینې برابرول او د کورنیو باغچو دودول دي.
