د کرنې وزارت سرپرست د جاپان سفیر میتسوجي سوزوکا سره د مخه ښې کتنه وکړه
۷ لړم ۱۳۹۹
د کرنې، اوبولګولو او مالدارۍ وزارت سرپرست او نوماند وزیر ډاکټر انوارالحق احدي، نن د خپل کار په دفتر کې په افغانستان کې د جاپان سفیر میتسوجي سوزوکا سره په انلاين بڼه خبرې وکړې. دغه انلاين لیدنه د مخه ښې لېدنې په توګه، په افغانستان کې د جاپان سفیر میتسوجې سوزوکا د کار د پای ته رسېدو په موخه تنظیم شوې وه.
په دې انلاين لیدنه کې دواړو خواوو په افغانستان د کرنې په برخه کې د جاپان تر مالي ملاتړ لاندې پر کرنیزو پروژو خبرې وکړې.
د مخه ښې په دې انلاين لیدنه کې د کرنې وزارت سرپرست ډاکټر انوارالحق احدي، په افغانستان کې د جاپان سفیر میتسوجي سوزوکا د خدمتونو او د هېواد د کرنې سکټور په برخه کې د جاپان هېواد له مرستو مننه وکړه.
ښاغلی احدي د تتسو ناکامورا د کړنو په هکله خبرې وکړې او وويل، چې هغه اوس په افغانستان کې په يو اتل بدل شوی دی او افغانان هلې ځلې کوي، کوم کارونه چې هغه کول هغو کارونو ته ادامه ورکړي.
دغه راز د جاپان سفير ميتسوجي سوزوکا د مخه ښې په دې انلاين کتنه کې وويل، چې د نوي سفير تر پېژندنې وروسته هم جاپان له افغانستان سره خپلې همکارۍ ته دوام ورکوي.
