ارزګان کې د مالدارۍ سکټور د پراختیا په پار هڅې؛ په ۸۰۰ مالدارو کورنیو د لبنیاتو د پروسس لمریزې دستګاوې وېشل شوي

۱ لړم ۱۳۹۹
د ارزګان دکرنې، اوبولګولو او مالدارۍ ریاست په روان ۱۳۹۹یم مالي کال کې ددې ولایت د مالدارۍ سکټور د پراختیا په پار هلې ځلې کړندي کړي، چې په ترڅ کې یې ددې ولایت په ۸۰۰ مالدارو کورنیو د لبنیاتو د پروسسس لمریز دستګاوې وېشل شوي دي.
د لبنیاتو د پروسس د یادو لمریزو د ستګاو د وېش ټولیز لګښت ۱۰ میلیونه او ۳۲۰ زره افغانۍ ده، چې د هندوستان هېواد په مالي همکارۍ ددې ولایت په ټولو ولسوالیو کې په ۸۰۰ مالدارو کورنیو وېشل شوي دي.
ددې ترڅنګ د مالدارانو روزل، په مرکز او ولسوالیو کې د ناروغو څارویو سمپل اخېستل، د کنې او کانګو ضد کمپاینونه په لاره اچول هغه څه دې، چې په د روان کال په ترڅ کې د ارزګان د کرنې او مالدارۍ ریاست له خوا تر سره شوي دي.
افغانستان له اقتصادي پلوه تر ډېره بريده په کرنه او مالدارۍ ولاړ دى، په همدې موخه د کرنې، اوبولګولو او مالدارۍ وزارت هم په دې وروستیو کې د مالدارۍ او د لبنیاتو د پراختیا په پار هلې ځلې کړندي کړي دي. د لبنیاتو پروسس او د مالدارو کورنیو اقتصادي ودې ته د کرنې وزارت پاملرنه تر پخوا زیاته شوې ده.