په افغانستان کې د نړيوال بانک له رييس سره د کرنيزو پروژو پر تمويل د کرنې وزارت د سرپرست ويډيويي خبرې اترې
۲۵ تله ۱۳۹۹
د کرنې وزارت سرپرست او نوماند وزير ډاکټر انوارالحق احدي، په افغانستان کې د نړيوال بانک له رييس هنري کارالي سره د ويډيو کانفرانس له لارې دهغو پروژو او برنامو په هکله چې ددې بانک له خوا تمويليږي خبرې وکړې.
په دې کنفرانس کې د نړيوال بانک د خوړو او کرنې نړيوال رييس لوراني لونچي، په افغانستان کې د نړيوال بانک عملياتي رييس هما زهرا فتوحي او د افغانستان لپاره دنړيوال بانک په دفترکې د کرنې د سکټور مسوول امان الله علیمزی شتون درلود.
په دې ويډيو کنفرانس کې، د کرنې وزارت سرپرست د کرنې وزارت د پروژو دتمويل په برخه کې د نړيوال بانک له مرستو قدرداني او مننه وکړه.
ښاغلی احدي وويل، چې د يوشمېر پروژو په پلي کولو کې دشته ستونزو د هوارولو په پار عملي ګامونه وچت شوي دي او شته ستونزې به هوارې شي.
په دې کنفرانس کې، په افغانستان کې د نړيوال بانک رييس د کرنې وزارت د پروژو پر تمويل ټينګار وکړ او وويل، چې د امېد پروژه او د کرنې او خوړوخونديتوب بېړنۍ پروژې ملاتړ او تمويلوي.
نړيوال بانک په افغانستان کې د کرنې په سکټور کې ديوشمېر پروژو تمويلوونکی دی.
