د کرنې وزارت په ادارې غونډه کې: د ۱۴۰۰مالي کال پر بودیجې خبرې اترې وشوې
۹ تله ۱۳۹۹
د کرنې، اوبولګولو او مالدارۍ وزارت په ادارې غونډه کې د ۱۴۰۰ مالي کال د بودیجې پر څرنګوالي خبرې اترې وشوې.
د کرنې وزارت مالي او اداري مرستیال عبدالهادي رفیعي ددې بودیجې په هکله اړین مالومات وړاندې کړ او وویل، چې بنسټیز وړاندیزونه شتون لري.
تر هغه وروسته، د کرنې وزارت د اوبولګولو او طبیعي سرچینو مرستیال حشمتالله غفوري او یوشمېر رییسانو د ۱۴۰۰ مالي کال د بودیجې او برنامو په هکله معلومات وړاندې کړل.
په دې غونډه کې د کرنې وزارت سرپرست او نوماند وزیر ډاکټر انوارالحق احدي د ۱۴۰۰ په بودیجه کې پر نوښتونو ټینګار وکړ او وویل، چې د راتلونکي کال په بودیجه کې باید نوښتونه رامنځته شي او دغه راز دا نوښتونه د کرنې او مالدارۍ په برخه کې اغېزمنتوب او معقولیت ته په پام سره باید تر سره شي.
په همدې حال کې، د کرنې وزارت د اوبولګولو او طبیعي سرچینو مرستیال حشمتالله غفوري غونډې ته په ویناکې وویل غوره ده، چې د ۱۴۰۰مالي کال په بودیجه کې د عالي اقتصادي شورا تایید شوې طرحې شامل شي.
په پای کې دکرنې وزارت سرپرست وویل، چې باید د بودیجې کمېټه جوړه شې او په دې برخه کې مفکورې پراختیا ومومي، ترڅو د بودیجې د لګولو اغېزمنتوب ډېر شي.
