۱۵ وږی ۱۳۹۹

د سرپل ولایت د نباتاتو خوندي کولو د کرنیزو درملو زېرمتون، ددې ولایت د سیمه ییزو چارواکو له خوا رسماً ګټې اخیستنې ته وسپارل شوه.

د سرپل والي عبدالقادر اشنا وایي، چې دغه زېرمه تون د کرنې، اوبولګولو او مالدارۍ وزارت له پراختیایي بودیجې څخه د څه باندې درې مېلیونه افغانیو په لګښت جوړه شوې ده. هغه وویل: «ددې زېرمه تون د جوړولو موخه د کرنیزو درملو خوندي توب او ښه کیفیت لرونکي کرنیز توکي تولیدول دي.» هغه وویل، چې تر دې وروسته ددې ولایت د مرکز او ولسوالیو بزګران او بڼوال کولا شي، چې له دغو درملو ګټه پورته کړي او خپل کروندې او بڼونه له ناروغیو خوندي وساتي.

ښاغلی اشنا زیاته کړه، چې د سرپل ولایت نږدې ۸۰ سلنه خلک په کرنه او مالدارۍ بوخت دي او د سرپل ولایت ښه اقلیم ددې لامل شوی، چې ددې ولایت بزګران او بڼوال ښه او ډېر محصولات ترلاسه کړي.

د سرپل والي وویل، چې په دې ولایت کې د کرنیزو درملو زېرمه تون جوړول اساسي اړتیا وه، تر څو د کرنې ریاست وکولا شي، چې کرنیز درمل پر خپل وخت د بزګرانو او بڼوالو په واک کې ورکړي.