د بادامباغ د نندارتون په سیمه کې د دوو ودانیو رغنیزې چارې پیل شوې
۲۳ زمری ۱۳۹۹
د کرنې، اوبولګولو او مالدارۍ وزارت د بادامباغ د کرنیزو نندارتونونو د جوړېدو په سیمه کې د ودانیزو چارو د پراختیا په دوام داځل ددې سیمې رسټورانټ او تشنابونه د ۱۷ میلیونه افغانیو په ارزښت جوړوي.
ددغو ودانیو د بنسټ اېښودلو په غونډه کې د کرنې، اوبولګولو او مالدارۍ وزارت اداري او مالي مرستیال عبدالهادي رفیعي وویل: «د بادامباغ د نندارتونونو د سیمې یوه کمۍ د معیاري رسټورانټ او تشناب نه شتون وه، چې ګټې اخیستنې ته د دغو تشنابونو او رسټوارنټ به سپارلو سره یاده ستونزه هواریږي.»
هغه زیاته کړه: «ددغو ودانیو په جوړېدو سره په دې سیمه کې جمعهبازار جوړېدو ته زمینه برابریږي، چې هېوادوال وکولای شي په مستقیمه توګه د جمعې په ورځ له دې بازار څخه کرنیز محصولات ترلاسه کړي.»
د کرنې، اوبولګولو او مالدارۍ وزارت د خصوصی سکټور مشر حبیبالله حبیبي هم وویل: «رسټورانټ او تشنابونه ددې لپاره جوړیږي، چې موږ وکولای شو په دې سیمه کې ملي او نړیوال نندارتونونه په لاره واچوو او په دې سیمه کې د کورنيو او سیمه ییزو سوداګرانو، تولیدکوونکو او متشبثینو شاهدان وسو.»
باید وویل شي، چې د کرنې وزارت د نندارتون ګډونوالو لپاره د لا اسانتیاوو برابرولو په پار د بادامباغ د نندارتون په سیمه کې ګډونوالو ته د سیورې ځایونه جوړ کړي او دغه راز د بادامباغ د نندارتون سیمې ته دتګ د سړکونو د پاخه کولو چارې هم پیل کړي دي، چې کارونه یې روان دي.
