پکتیکا کې د زعفرانو ننداریزې قطعې جوړیږي
۲۹ غبرګولی ۱۳۹۹
د پکتیکا د کرنې، اوبولګولو او مالدارۍ ریاست له خوا د پکتیکا ولایت د مرکز په کډون ددې ولایت د خیرکوټ، جانخیل، متاخان، اورګون او سروبي ولسوالیو کې پر یوشمېر بزګرانو د زعفرانو ننداریزو قطعو جوړولو په پار د زعفرانو پیاز او نور اړین توکي وېشل شوي دي.
د پکتیکا د کرنې رییس ابوبکرحقیار وایي، چې ددې ولایت د مرکز په کډون د خیرکوټ، جانخیل، متاخان، اورګون او سروبي ولسوالیو کې د زعفرانو شپږ ننداریزې قطعې جوړیږي. د ښاغلي حقیار په خبره د یادو ننداریزو قطعو د هرې نیم جریبه قطعې د جوړولو په پار پر بزګرانو د زعفرانو ۵۰۰ کیلو پیاز، تقویتي سره او دزعفرانو د ګل ټولولو توکي ووېشل شول.
په هغه غونډه کې، چې په همدې موخه جوړه شوې وه د پکتیکا مرستیال والي انجنیر شیربادشاه ارګوني په خپلو خبرو کې په یاده برخه کې د کرنې اوبولګولو او مالدارۍ رياست کړنې وستایلې او په بزګرانو يې غږ وکړ چې د زعفرانو روزنې، پالنې او ساتنې ته جدي پام وکړي.
په ورته وخت کې د پکتیکا د کرنې رییس ابوبکر حقیار وویل، چې ددغو مرستو موخه په دې ولایت کې د زعفرانو د کرکېلي دودول او له دې لارې د بزګرانو د عوایدو زیاتول دي. هغه وویل، چې د پکتیکا ولایت اقلیم د زعفرانو کرکېلي لپاره مناسبه اقلیم ده او هیله یې وښودله چې په دې ولایت کې د زعفرانو کرکېله نوره هم پراخه شي.
