ننګرهار کې د شیدو راټولولو څلورو مرکزونو سره د ۲۰ زره ډالرو په ارزښت د وسایلو مرسته وشوه

۳۰ وږی ۱۴۰۵ هـ.ش

۸ رَبِیعُ الْثاني ۱۴۴۸ هـ.ق

د ننګرهار د کرنې، اوبولګولو او مالدارۍ ریاست په هڅو، د افغانستان لپاره د هالینډ کمېټې په تخنیکي همکارۍ او د اروپایي ټولنې په مالي ملاتړ، د دغه ولایت په څلورو ولسوالیو کې د شیدو راټولولو مرکزونو د پیاوړتیا په موخه د ۲۰ زره امریکایي ډالرو په ارزښت لوجستیکي او تخنیکي وسایل برابر او ووېشل شول.

د ننګرهار دکرنې، اوبولګولو او مالدارۍ ریاست چارواکي وایي، چې د افغانستان لپاره د هالینډ کمېټې په همکارۍ، د دې ولایت د بټي کوټ، دره نور او کوزکونړ ولسوالیو د شیدو راټولولو مرکزونو ته اړین لوجستیکي او تخنیکي وسایل برابر شوي دي.

د دوی په وینا، په رودات او بټي کوټ ولسوالیو کې دوه نوي د شیدو راټولولو مرکزونه جوړ شوي او په دره نور او کوزکونړ ولسوالیو کې له مخکې جوړو شوو مرکزونو سره هم د اړتیا وړ وسایلو مرسته شوې ده.

په همدې حال کې، د ننګرهار د کرنې، اوبولګولو او مالدارۍ رییس مولوي عبدالستار محمد وايي، د هالینډ کمېټې له لوري له یادو مرکزونو سره د وسایلو په مرسته کې، نویو جوړو شوو مرکزونو ته ۳۰ قلمه او له پخوانیو جوړو شوو مرکزونو سره ۱۲ قلمه لوجستیکي او تخنیکي وسایل ورکړل شوي دي.

نوموړي زیاته کړه، د هر مرکز لپاره د شاوخوا پنځه زره امریکایي ډالرو په ارزښت وسایل اخیستل شوي، چې له دې لارې به د لبنیاتو د راټولولو لپاره معیاري او منظم مرکزونه رامنځته شي، د مالدارانو شیدې به په یوه واحد ځای کې راټولېږي او د کیفیت له پلوه به په مناسبه توګه پروسس او بازار ته وړاندې کېږي.

د ننګرهار د کرنې رییس د افغانستان لپاره د هالینډ کمېټې او اروپایي ټولنې له همکارۍ او مالي ملاتړ څخه مننه وکړه او غوښتنه یې وکړه، چې د مالدارانو د اقتصادي پیاوړتیا او د لبنیاتو د صنعت د ودې لپاره دې ورته پروګرامونه نورو سیمو ته هم وغځول شي.

ورسره، د ننګرهار د اقتصاد رییس مولوي جان‌محمد حامد په دغه ولایت کې د شیدو راټولولو مرکزونو پیاوړتیا د مالدارانو د ملاتړ او د لبنیاتو د سکتور د ودې په برخه کې مهم ګام وباله او د خپلې ادارې په استازیتوب یې د هر اړخیزې همکارۍ ډاډ ورکړ.

د مسؤلینو په وینا، د یادو مرکزونو د تجهیز له لارې به د مالدارانو لپاره د شیدو د راټولولو، ساتنې او بازارموندنې اسانتیاوې لا پراخې شي او د لبنیاتو د تولید او پروسس په برخه کې به د معیاري خدمتونو زمینه برابره شي.