هلمند کې د څه باندې ۵.۴ میلیونه افغانیو په لګښت د ۱۷.۸ کیلومتره زهکشۍ کانالونو د پاکولو پروژه پیل شوه

۲۹ وږی ۱۴۰۵ هـ.ش 
۷ رَبِیعُ الْثاني ۱۴۴۸ هـ.ق
د هلمند ولایت مرکز اړوند په بولان، ګرشک او سنګین ولسوالیو کې د زهکشۍ کانالونو د پاکولو پروژه د کرنې، اوبولګولو او مالدارۍ وزارت د استازو، د هلمند د کرنې ریاست د مسؤلینو، قومي مشرانو او سیمه‌ییزو اوسېدونکو په حضور کې پرانیستل شوه او عملي چارې یې پیل شوې.
دغه پروژه د کرنې، اوبولګولو او مالدارۍ وزارت له پراختیايي بودیجې څخه د ۵ میلیونه، ۴۳۹ زره او ۹۸۵ افغانیو په لګښت پلې کېږي.
د پروژې په ترڅ کې به د ۱۷.۸۷۶ کیلومتره په اوږدوالي د زهکشۍ کانالونو د پاکولو چارې ترسره شي، چې د کارونو له بشپړېدو سره به شاوخوا ۶ زره جریبه کرنیزه ځمکه له ولاړو اوبو څخه خلاصه او د دوه‌فصله کرنې لپاره چمتو شي.
د هلمند د کرنې ریاست مسؤلین وایي، د دغې پروژې په بشپړېدو سره به د کرنیزو ځمکو د بیا رغونې ترڅنګ، د ځمکو د کرنیز ظرفیت د ښه کېدو، د حاصلاتو د زیاتوالي او د بزګرانو د اقتصادي وضعیت د ښه والي لپاره هم زمینه برابره شي.
مسؤلین زیاتوي، د زهکشۍ کانالونو پاکول به د اضافي اوبو د منظم ایستلو په برخه کې د کروندګرو ستونزې راکمې او د کرنیزو ځمکو د اغېزمنې استفادې زمینه به لا پراخه کړي.
د زهکشۍ کانالونو پاکول د کرنیزو ځمکو د اوبو ایستلو، د ځمکې د ښېرازۍ ساتلو او د ولاړو اوبو له امله د رامنځته کېدونکو ستونزو د مخنیوي لپاره مهم رول لري. د دغو کانالونو په پاکولو سره له اضافي اوبو څخه د کرنیزو ځمکو د ژغورنې ترڅنګ، د ځمکو د بیا رغونې او د دوه‌فصله کرنې د پراختیا زمینه هم برابرېږي، چې په پایله کې د کرنیزو حاصلاتو د زیاتوالي او د بزګرانو د عوایدو د لوړولو لپاره زمینه برابروي.