کرنې وزارت کې د ځنګلونو د ساتنې او د لرګیو د قاچاق د مخنیوي کمېټې غونډه ترسره شوه

۱۸ وږی ۱۴۰۵ هـ.ش
۲۶ رَبِیعُ الْأَوَّل ۱۴۴۸ هـ.ق
د افغانستان اسلامي امارت د ځنګلونو د ساتنې او د لرګیو د قاچاق د مخنیوي کمېټې غونډه، د کرنې، اوبولګولو او مالدارۍ وزارت د اوبولګولو او قدرتي سرچینو مرستیال مولوي بازمحمد فیضان په مشرۍ، په دغه وزارت کې ترسره شوه.
په دې غونډه کې د کورنیو چارو وزارت د پلان او پالیسۍ مرستیال مولوي عبدالحق مخدوم، د صنعت او سوداګرۍ وزارت مرستیال مولوي احمدالله زاهد، د چاپیریال ساتنی اداری مرستیال، د کرنې وزارت د اطلاعاتو، عامه پوهاوي رییس او ویاند مولوي شیرمحمد حاتمي، د ځنګلونو رییس مولوي حسین احمد خورشید، د ملي دفاع وزارت او استخباراتو استازو او د کرنې سکټور سلاکارانو ګډون کړی و.
د غونډې په پیل کې د کرنې، اوبولګولو او مالدارۍ وزارت د اوبولګولو او قدرتي سرچینو مرستیال، د کمېټې د تېر یوه کال د فعالیتونو راپور وړاندې کړ او د کمېټې له غړو یې وغوښتل، چې د ځنګلونو د ساتنې او د لرګیو د قاچاق د مخنیوي په برخه کې خپل طرحې، وړاندیزونه او نظرونه شریک کړي.
ورپسې د کمېټې غړو خپل نظرونه او وړاندیزونه وړاندې کړل او د ځنګلونو د ساتنې، د ونو د غیرقانوني پرېکولو او د لرګیو د قاچاق د مخنیوي په موخه یې د اړوندو ادارو ترمنځ د کاري همغږۍ او اړیکو پر پیاوړتیا ټینګار وکړ.
همداراز، په غونډه کې په ولایتونو کې له حکومتي مسؤلینو او ځنګلبانانو سره د ناستو او خبرو اترو د ترسره کولو په اړه بحث او د نظرونو تبادله وشوه، څو د ځنګلونو د ساتنې بهیر لا ښه او په دې برخه کې لا ډېره همغږي رامنځته شي.
غونډه په دعایې سره پای ته ورسېده.