ننګرهار کې د سټروسو نږدې زر جریبه نوي بڼونه جوړیږي

۲۹ سلواغه ۱۳۹۸
د هېواد په ختیځ زون کې «ننګرهار، کونړ او لغمان» هغه ولایتونو دي، چې هوا او ځمکه یې د سټروسو نیالګیو ته جوړه او مناسبه ده. خو د دغو ولایتونو له ډلې بیا په ننګرهار ولایت کې د سټروسو «مالټې، نارنج او لیمو» بڼونه ډېر دي.
د ننګرهار په ټولو ولسوالیو کې د سټروسو بڼونه شته او خلک په خپلو کورونو او کروندو کې د سټروسو ونې اېښي دي او يا د سټروسو بڼونه جوړ کړي دي، خو د ننګرهار د سټروسو ډېری بڼونه ددې ولایت په خېوې، کامې، ګوشتې، سره رود، بهسود، بټي کوټ، غني خیلو، خوګیاڼي، رودات، مومندرې، دره نور ولسوالیو او د جلال اباد په ښارکې شتون لري.
په هېواد کې د سټروسو او نورو مېوه لرونکو بڼونو د جوړولو د هلوځلو په دوام داځل د کرنې وزارت د کرنې دودې او کلیوالي پراختیا پروژې « CBARD» له خوا په ننګرهار کې د سټروسو او نورو مېوو ۹۶۰ جریبه نوي بڼونه جوړیږي.
د ننګرهار د کرنې ریاست وایي، چې د کرنې دودې او کلیوالي پراختیا پروژې له خوا سږکال ددې ولایت په اچین، کوټ، رودات، خوګیاڼي، شیرزاد او چپرهار ولسوالیو کې د مالټې، لیمو، املوک، شفتالو، مڼې، چهارمغز، ناک، الوچې او ګیلاس ۹۶۰ جریبه نوي بڼونه جوړیږي، چې په دغو بڼونو کې به ۱۳ زره او ۹۰۰ او ۹۸ تصدیق شوي نیالګي کېنول شي.
د کرنې دودې او کلیوالي پراختیا پروژه « CBARD» پر دې سربېره، چې کروندګرو ته به تصديق شوي نيالګي ورکړي، له هغوی سره د باغونو په نقشه اچولو، د اوبولګولو د سيسټم په جوړولو او د بڼوالۍ د مديريت اړوند ځينو نورو برخو کې هم تخنيکي او فني مرستې کوي.
د ننګرهار د کرنې ریاست چارواکي وایي، چې د مېوو نوي بڼونه جوړول په دې ولایت کې د بڼوالۍ په برخه کې لوی پرمختګ دی.
د کرنې وزارت هلې ځلې کوي، چې ننګرهار ولایت کې بڼوالۍ ته وده ورکړي، هغه ونې ترویج کړي چې په ډېره لنډه موده کې مېوه نیسي او ښه کمیت او کیفیت لرونکي وي، تر څو د بڼوالۍ محصولات ډېر او د بڼوالو عواید زیات شي.