د کرنې وزیر په بهرنیو چارو کې د هند د دولت له وزیر سره وکتل

د افغانستان اسلامي امارت د کرنې، اوبو لګولو او مالدارۍ وزیر، مولوي عطاءالله عمري، هند جمهوریت ته د خپل رسمي سفر په ترڅ کې د هند د بهرنیو چارو او نساجۍ وزارت له مرستیال وزیر، پبیترا مارګریتا، سره وکتل او د کرنې، مالدارۍ او سوداګرۍ په برخو کې یې د دواړو هېوادونو د همکاریو د پراختیا په اړه خبرې وکړې.
په دې کتنه کې دواړو لورو د افغانستان او هند ترمنځ د دوستانه اړیکو پر پیاوړتیا، د کرنې او مالدارۍ په برخو کې د همکاریو پر پراختیا، د تجربو پر تبادلې، د کرنې سکټور پر پرمختګ او د اقتصادي همکاریو پر پراخولو ټینګار وکړ.
د هېواد د کرنې، اوبو لګولو او مالدارۍ وزیر، مولوي عطاءالله عمري، د افغانستان د کرنې او مالدارۍ سکټور پراخو ظرفیتونو ته په اشارې وویل، افغانستان چمتو دی هغه کرنیز او حیواني محصولات چې هند ورته اړتیا لري، برابر او دغه هېواد ته یې صادر کړي. نوموړي همداراز د دواړو هېوادونو ترمنځ د سوداګرو د تګ راتګ د اسانتیا پر اهمیت ټینګار وکړ او د سوداګرۍ د پراختیا او د سوداګریزو راکړو ورکړو د زیاتوالي لپاره یې د لا ډېرو اسانتیاوو د برابرولو غوښتنه وکړه.
د هند جمهوریت د بهرنیو چارو وزارت مرستیال وزیر، پبیترا مارګریتا، هم له دې کتنې څخه د خوښۍ په څرګندولو سره، د افغانستان اسلامي امارت له پلاوي سره په بېلابېلو برخو کې د هند د همکاریو پر دوام ډاډ ورکړ او د دواړو هېوادونو ترمنځ یې د دوه‌اړخیزو اړیکو د لا پراختیا پر اهمیت ټینګار وکړ.